ZALEN April 13, 2026 : Mizo Hnam Run political session vawiina neih-ah MNF Vice President & AMC Election Campaign Committee Vice Chairman Lalchhandama Ralte chuan thu a sawi a. AMC Election 2026 atan MNF-in Candidate an nei tha ber tiin sawrkarna siam leh ngei an beisei thu a sawi a, Brigade Field enho turin MNF Thalaite chuan ZPM Thalaite an ngakthlawn niin a sawi.

Lalchhandama Ralte chuan, "AMC inthlan hun hi February, 2026 zawh hma tur kha a ni a. Chhuan lam tur engmah awm lo kha, ZPM chuan AMC-a chak an inrin loh avangin chhuanlam siamin an sawn hla a. Ran khuahkhirhna dan an putluha an pass ngei pawh, kan ennawn dawn an tih te hi an mawng an hlim tihna a ni.

ZPM sawrkar hnuaia tax sang em emte hi AMC-a an sawrkarna an siam chuan mi retheite mi sawr fu zel ang tih chu an ke pen dan en hian a lang chiang hle a. Aizawl khawpui mipuite hian vote an pek ka ring lo. Kum hnih erh awrh an sawrkar chhunga kan ipte an zen dan en hian zirtirna pek an ngai," a ti.

Chhantea chuan ZPM sawrkar chungchang sawiin, "He sawrkar hian sum a puk hnem zia te, financial management an thiam loh ziate, an sawi loh dan hlira an khawsak dante kan hmu vek a. State leiba ni se kan state budget aia tam an nei a. Tun hmaa an tih thin dan takin chhut chhin ta ila ZPM sawrkar hnuaiah mi pakhatin Rs. 1,55,640 zel leiba kan nei," a ti a. Municipal pawisa an tih lapse pawh Rs. vbc 33.98 a tlin thu a sawi bawk.

MNF Vice President chuan ZPM sawrkarin Mizoram khawpui(capital) sawn tuma hma an lak dan sawiin, "January 2026 khan Prime Minister hnenah DO letter ziakin kan chief minister chuan Mizoram khawpui sawn dilna a lo thawn a. Kan hrechhuak dawna an hriat hnuah Thenzawl peace city tiin an thlak leh a ni, tiin ze nghet an neih loh thu a sawi a. Sum tam tak an tih lapse thu leh Brigade field enho tur ZPM thalaite chona angin Thawhtanni (April 13, 2026) zing dar 7 khan MNYF-ten a hmunah an nghak thlawn a, ZPM Thalai an lapse leh bawk," a ti.