Inkhelh tawpah Brighton boss Roberto De Zerbi chuan, “Chak kan phu, semi-final-ah pawh khan kan phu tawh zawk,” tiin a sawi.

Ningani zan khan de Zerbi team hian Manchester United chu hun tawp dawna penalty an thun hmangin an hneh a, Europe-a inlan beiseina an nei sang zel a, hetih lai hian United erawh Champions League khel phak dinhmunah la ding mah se an hnuaia mite tan pawt thla tura phurna an siam thar sawt ve thung.

Amex Stadium-a inkhelah hian minute 99-ah Luke Shaw-a handball vanga penalty an hmuh chu Alexis Mac Allister-a’n chhuih lutin FA Cup semifinal-a an tlawmna an chhang let.

United hi palinaah la awmin Champions League khel thei hniam ber an la ni a, an hnuai chiaha awm, Liverpool aiin point liin an la sang a, vawi khatin an khel tlem thung.

Boss sawi angin Brighton hian ‘chak an phu’ tiin a sawi thei a, video assistant referee-a ennawna penalty an hlawh hma pawhin vawi tam tak United tlarhnung an tihthaih.

Lehlam lehlamin chance tha an nei hma hle a. Antony-a chuan tan deuh phata United tan remchang tha tak hmuin goal zawn lo chiahah a pet a; Marcus Rashford leh Antony Martial te pawhin Brighton keeper Jason Steele-a tan save pawimawh tak tak an siamsak.

Brighton hian kartawpah khan 6-0 zetin Wolves an lo sawp tawh a, an la phur tluang zel a. Kaoru Mitoma pet chu David de Gea chuan tha taka dangin United striker hlui, Danny Welbeck pawhin a hun tha neih a hmang tangkai lo.

Seagulls hian hun tawp dawn lamah an nawr na zual a, De Gea a che tha a, Mac Allister leh Pervis Etupinan te pet a dang tha hle.

Ni 11 lek liam taa FA Cup semi-final-ah khan  United hian Wembley-ah an lo hneh tawh a; mahse, league-ah chuan vawi hnih khelhah a tlawm zawkah an tang ve ve ta thung.

De Zerbi-a hote hi paruknaah awmin Tottenham leh Aston Villa chungah an awm ta a, Europe-a inlan phak ngei an inbeisei a. Liverpool aiin aiin point liin la hniam zawk mah se khelh hnihin an khel tlem zawk thung a, lehpelh theihna hun remchang tak an nei mek.

“Khelh that chuan chak loh awm mah se a tawpah hnehna kan chang thin, chu chu football-a ka lo tawn tawh thin a ni,” a ti.

Ten Hag ve thung chuan, “Tlawm zawka tan hi a pawi vek a; mahse, hun tawp dawna chak loh chu a thinrimthlak bik,” a ti a. United hi an inkhelh hnuhnung vawi 17-a an chak loh vawi sarihna a ni a, vawi sarih chakin vawi thum an hnehtawk.