Tlakhniam hlau, Everton chuan Thawhtanni zan khan Brighton khelmualah counter-attack pui tak khelin mual neitu chu 5-1 in an sawp a, Premier League atanga tlahniam thei dinhmuna an dinna an chhuahsan ta a, Seagulls tan erawh Europe-a inlan an tumna kawng tibumboh zualtu a ni ta thung.

Toffees hian tha zeta bul tanin second 34 lekah Dominic Calvert-Lewin-a thawh rah atangin Abdoulaye Doucoure chuan a thun nghal.

Mali midfielder Doucoure hian darkar chanve an khelh tlin hmain Dwight McNeil-a vawrh luh atangin a thun belh zui a. McNeil hi an goal thumna, minute 35-a Brighton goalkeeper Jason Steele-a’n an lama a tihluh palhah pawh thuk taka inrawlhin a thawh rah bawk a ni.

Chawlhlawk hma hian Sean Dyche team hian mual neitu an chhaih buai hle a, goal li an thun tep zawk a, captain Lewis Dunk chuan hnai tak atanga James Garner-a pet chu a lo dang hlauh zawk a ni.

Chawlhlawk dawnah meuh chuan Brighton hi anmahni tantuten an ‘boo’ hluah hluah hman a; mahse, luh leh hnuah an zia ta deuh va; mahse, Everton hi an inven that tawh avangin an su pawp zo meuh lo.

Goal hnih an thuna thawh hlawk tak, McNeil chuan Alex Iwobi pek hmangin mikhual zawkin an thun belh leh.

Roberto de Zerbi-a’n chawlhlawk zawh chiahah mi pali a thlak nghal erawh chuan awmzia a nei deuh va, substitute Evan Ferguson chuan vawi hnih ban a tihper bakah Alexis Mac Allister pawhina  tihper a. Argentine midfielder Mac Allister hian Kaoru Mitoma thawh rah atangin si khat a sut zui ta bawk.

Mahse, Toffees an phur laklawh a, hun tawp dawnah McNeil chuan a thun belh leh ta tho va, hun a tawp meuh chuan mikhual zawk 5-1 in an chak.

Everton hi inkhelh hmaa 19-naa awm niin point thum an hawn hmangin 16-naah an kai ta a, khelh thum an la bakah Leed United chu tlahniam thei dinhmunah an nawr thla.

Thawhtanni zan zanlaiah a mawng phah pahnih, Nottingham Forest Southampton an inhmachhawn dawn a. Forest hian hnehna an chang a nih chuan Everton hi an lehpel ang a, 16-naah kaiin Toffees hi 17-naah an tla zui dawn a. Thawhtanni zan veka Fulham laka tlawm, Leicester City chu tlahniam thei zingah tawlh thlain 18-naah an awm ang.

Seagulls tan an chak lo hi a pawi a, pasarihnaah awmin an dinhmun hniam phah lo mah se season tharah khawmualpui huap inelnaa inlan tum an ni a, point thum hlawh sela panganaa awm, Liverpool aia point li chauhva hniam thei tur, khelh hniha la khel tlem zawk ni mai tur an ni a; mahse, tunah chuan point sarih zetin an phak lo mek a, khelh hnihah hian chak ve ve pawh ni se pangana hi an luah phak dawn rih lo.

Anfield club nena an inkarah Tottenham an awm a, point hnihin an phak lo mek a. Anni ai hian khelh hnih thovin an khel tlem zawk a, an khelh kima point an hlawh dan azirin paruknaah luahlan thei erawh an la ni.