ZALEN December 11, 2025: Mizoram Youth Commission chuan vawiin khan Aizawl Press-ah thuthar thehdartute an kawm a, he hunah hian an chairman Malsawmzuala Ralte chuan kum 2025-26 chhungin MYC kaltlangin min 222-in hna an hmu a ti a, ZPM sawrkar hnuah mi 400 te hna an hmuh sak tawh thu a sawi.

Malsawmzuala chuan Mission UPSC hnuaiah UPSC prelim-a tlingte an zirna bungrua leina an tumsak thin thu a sawi a, mi 35,000 zel an pe a ti a, Mains-a tling pakhat chu a kalna leh hawna leh a thlenna ei leh in an tumsak thu a sawi. Super IAS-a coaching class nikum thlenga Delhi-a kal Andy L. Khobung, Chanmari West chu UPSC CDS exam-ah a inziaktling tih a sawi.

MYC kaltlang hian 2025-26 chhung hian Hotel management, Food & Beverage training chhuak mi 136 in hna an hmu a, nikum lama mi nen mi 258 an tling tawh. MYC coaching zirlai te atangin kumin hian mi 66 te sawrkar hnaah an inziaktling a, nikum lamah khan mi 33 an inziaktling bawk.

MCS Combined Exam Coaching Class, Group B&C Coaching Class, SSC, banking & Railway Coaching Class, Hotel management, food & beverage training te an kalpui thu a sawi a. Hotel management, food & beverage training atangin hian 2025-26 chhungin thlai 136 ten hna an hmu a, an zawm tawh a ti. Spa Therapist mi 14 2025-26 chhungin mi 14 te Lalit hotel hnuaiah hna an hmuh tawh a ti bawk.

MYC kaltlangin mi 5 te chuan kumin March khan British Army-ah training an zawm a ti a, British Army-ah hian kum 18-36 inkar pawl 12 pass chin passport nei tan a dil theih tih chairman chuan a sawi a, kar 8 chhung vel an training a, an training chhung pawh hian thla khatah Rs 2,00,000 an hlawh pha a ti.

MYC Chairman chuan, TATA Strive leh National Skill Development Corporation International (NSDCI) te nen an thawkho a ti a, NSDCI te nen hian Japan-a nurse thawk tur an buaipui thin a ti.

Online hmangin Mentorship Programme an kalpui tih a sawi a, a vawikhat nan July-October, 2025 khan neih a nih thu leh January 2026 hian neih leh tum a ni a ti a, hei hi a thlawna kalpui thin a nih thu a sawi.

Top International, Taiwan te nen thawhhona thuthlung an ziak a, MYC-in Taiwan-a Chinese tawng zira an tirh chu zirtirtu-ah hmanga a pass apiang chu TOP International company te hian Taiwan-ah hna an hmuh sak thei dawn a, BA pass leh Class 12 pass tan pawh hna awm thei tura ngaih a ni a ti.

Learnet Guwahati nen thawhhona neiin Germany-a nurse hna thawk duh tan Guwahati-ah German tawng an zir ang a, thla 10 chhunga tawng an thiam a, an pass hnuah an thawk thei dawn a, tunah hian mizo thalai 6 te German tawng zirin an awm mek a ti. Japan-a upate enkawlna/old age home a thawk duh pawl 12 pass thin tan Guwahati-ah hian Japan tawng zir theih a nih thu a sawi a, heng zirna senso atan Learnet hian loan an buaipui sak thei a ni.

MYC chuan Corporate Social Responsibility (CSR) atanga puihna petu Honda, SBI leh MRB chungah lawmthu an sawi a, heng ho atanga an sum hmuh zawng zawng hi Rs. 57,72,318.00 a ni an ti.