The Sunday Times chuan British mi leh sa, thalai kum 35 hnuai lam zinga hausa zual an thang chhuak a, chung zingah chuan - Ed Sheeran, Adele leh Dua Lipa te pawh an lang. English singer Ed Sheeran hausakna hi £mtd 300 a ni a, pasarihna a hauh phak.
 
Top 10 te chu...
The Sunday Times Rich List-ah hian Duke of Westminster chuan dinhmun sang ber a luah a, £tld 9.878 neiin a sang fal hle. Top 10-a lang zinga hriat hlawh ber chu kum 32 mi Ed Sheeran a ni a, a hausakna £mtd 300 pawh a hniam lo hle. Zaithiam zinga amah hnaih bertu Adele hausakna chu £mtd 165 a ni a, pakuana a ni. Harry Styles (£mtd 150) chu 15-na a ni ve bawk a, boxer  Anthony Joshua nen an dinhmun a inang a ni. 

Ed Sheeran sum lakluhna hnar ber chu album hralhna a ni a, nikuma a tihchhuah a album parukna 'Subtract' kha copy maktaduai eng emaw zat a hralh a ni. Adele pawh hian a album tihchhuah hrang hrangte chu copy maktaduai 100 chuang a hralh tawh a, tour leh thil dang atangin a lalut nual bawk. Kuminah Las Vegas residency a neih atangin show vawi khatah £500,000 lalut ziah tura chhut a ni bawk. Harry Styles album 'Harry's House' hi nikum chhung khan UK-a album hralh kal ber zinga mi a ni a, tour atangin sum a lalut hnem hle bawk. 

Kum 35 hnuai lam hausa zingah hian actor Daniel Radcliffe pawh a lang a, Harry Potter star sum neih zat hi £mtd 92 a ni. Kum 27 mi Dua Lipa (£mtd 75) pawh a langsar zingah a tel a, Harry Potter star Emma Watson pawh a duai bik lo. 

British thalai hausa zual top 10
1. Duke of Westminster - £tld 9.878
2. Lady Charlotte Wellesley - £tld 2.167
3. Johnny Boufarhat - £tld 1.714
4. Ben Francis - £mtd 900
5. India Rose James - £mtd 758
6. Oliver and Alexander Kent-Braham - £mtd 455
7. Ed Sheeran - £mtd 300
8. Rory McIlroy - £mtd 200
9. Adele - £mtd 165
10. Timothy Goodwin - £mtd 163

British mi hausa zual te
British khua leh tui hrim hrim zinga haua ber chu Gopi Hinduja & family te a ni a, an hausakna hi £tld 35 a ni. Mumbai-a hmunpui nei Hinduja Group te hi - banking, finance, media, entertainment leh energy lamah an lian hle a, hna thawktu pawh khawvel hmun hrang hrangah 200,000 vel zet an nei a ni. 

Pahnihna dinhmun luahtu chu Football club ropui Manchester United lei tumtu zinga mi Sir Jim Ratcliffe a ni a, £tld 29.7 zet nei anga chhut a ni ve bawk. 

1. Gopi Hinduja & family – £tld 35 
2. Sir Jim Ratcliffe – £tld 29.7 
3. Sir Leonard Blavatnik – £tld 28.6 
4. David and Simon Reuben and family – £tld 24.4
5. Sir James Dyson and family – £tld 23