WBC champion Tyson Fury leh amah chotu Dillian Whyte te pahnih chu Pathianni khian an inhnek dawn a, heavyweight bout neih tur an puan hnua mipui hmaa an inlanna hmasa berah an pahnih hian inzahderna lan tir tawnin, boxer dangte inhmachhawn anglo takin kut thingin an inchibai. 

Briton pahnih te hi Inrinni zan keini lama Pathianni zing khian Wembley Stadium-ah an innuai dawn a, a hmunah entu mipui 96,000 chuang an punkhawm beisei a ni. February 2020-a WBC title a kawl hnua a vawi hnih nan Fury kum 33 mi hian a kawnghren hum a tum dawn a ni. 

WBC leh Ring Magazine champion Fury hian bout 32-ah hneh loh ala tawng lo va, while Whyte thung hi vawi 30 a inhnek tawhah tum hnih a tlawm tawh thung. Whyte-a kum 34 chuan an inhnek tur chungchang sawiin, "Inbeihna lian tham a ni dawn a, ka phur tawh tak zet. He hmunah hian duh aiin ka inlan hma thei lova, pawi ka ti, mah se hei tunah ka rawn ding chhuak e," tiin mipui hmaah a sawi. 

Whyte leh Fury te pahnih inchotuah hi beisei angin a hot lo a, Queensbury promoter Frank Warren pawhin a duh angin a chotuah hleithei lo. Khawvel hmun hrang hrang atanga kal khawm reporter leh media te hmaah cool takin an khawsa a, beisei loh takin an infak tawn. Mi inhnek tur chu mahni an inhrosa a, an beihpui turte diriamna tawngkam an chhak chhuak thin kha a ni a, anni pahnih chuan an fight pui turte thatna lai an sawi daih. 

Gypsy King(Fury) chuan a insualpui tur Whyte-a chungchang sawiin,"Fighter tha tak a ni a, a lianin a chak a, tha rum leh tha hrui a ngahin a hnek a na a, mi tam tak a hnek tlu tawh a ni. Dillian hian zah a phu a, ka zah a ni. Tun tumah hian Deontay Wilder leh Wladimir Klitschko te ka hmachhawn dawn tuma ka training aia nasain ka inbuatsaih bawk," a ti.