Thangkhat lian aia rei mah kan buaina ni tawh Mizoram atanga Tripura transit camp a khawsa mek Bru (Tuikuk) te hmalam hun chu sawrkar laipui hmalakna in chin fel a ni ta a, tunah chuan Bru mipui nawlpui te chu Tripura ah an khawsa dawn ta hi Mizo mipui te tan chuan thu lawmawm tak a ni.

Mizoram atanga tlanchhia Bru te hi vawi engemaw zat hruaikir tum an ni tawh thin a, sum pawh vaibelchhe tam tak sen a ni tawh bawk. Mahse heti chung hian chhuanlam chi hrang hrang siamin vawiin ni thlengin mipui nawlpui chu an la rawn let duh lo a. Hei hian titi a ti tamin eng vanga lo let duh lo nge an nih tih hriat a har hle a. Sawrkar laipuiin chhawmdawlna tur sum leh thildang a tawktarh te hi a that tehreng nen an haw duh miau si lo a. Mahse tunah chuan an haw duh loh chhan hi a chiang ta hle a ni.

Bru awm zel dan turah hian tunhnaiah sawrkar laipui, Mizoram sawrkar, Tripura sawrkar leh Bru pawl hrang hrang aiawhte chuan inremna ziakin November ni 30, 2019 hnu lama Tripura a Relief Camp a la awm mekte chu an duhthlanna in Tripura ah an cheng hlen thei dawn ta a. Hruaikir hna (repatriation) lo kalpui tawh a Mizoram a kir leh te tan erawh Tripura ah let leh remtih a ni dawn lo a. Tripura sawrkar chuan an state chhunga relief camp a cheng mek zat chu enfiahna thar hlak siam in, chhawmdawlna (resettlement) kalpui a nih zawh hnu chuan heng relief camp te hi khar tawh tur a ni. India sawrkar chuan sum leh mamawh dang Tripura sawrkarin a neih te theih ang chen chenah a pui dawn a ni.

Bru te hi kawng lehlama ngaihtuah chuan an khawngaih thlak a, kawng leh lama ngaihtuah chuan heti tak maia mi khawngaih an hlawh hi lawmna chang an hre tur a ni. Sawrkar laipuiin duat takin a enkawl a, chumai ni lovin Mizoram sawrkar pawhin hamthatna hrang hrang dawn tur nen thlem chikimin a thlem bawk a, mahse a rukin tum an lo nei nge ni Bru pawl hrang hrang nen inremna ziak a ni chungin hruaikir hnathawhna ah kir an tlem thei hle anih kha.

Bru vanga buaina hi chinfel a ni ta niin a lang a, political party leh pawl hrang hrang te pawhin lawmawm an tih thu thuchhuah an siam a. Chutih rual erawh chuan Bru vanga Mizo mipuite buaina hi a tawp mai ang em tih zawhna awm thei a ni thung. Bru mipuite Tripura lama an tlanthlak hlim khan Sakhan tlangdunga Mizote vau in an in leh huan tam tak an ti chhia a, tam tak chu Mizoram ah an lo tlanchhe hial anih kha. Tunah hian Jampui tlangdungah Mizo engemaw zat an khawsa mek a, chung mite chuan harsatna an tawk lovang tih sawi a har hle. Chuvangin sawrkar hian Bru te awmdan hi a ngaihven zui reng a, a tul anih chuan Mizote thlavang hauh tura a inrin reng ngai a ni.