Aizawl: Tripura Relief Camp-a paruk atanga Mizoram mi leh sa Reang (Bru)-te hruai let hna thawh 8-na atana inbuatsaihna chu Mizoram sawrkar officials ten Camp hrang hrangah an thawk mek. Identification kalpui mekah hian Mizoram let duh ngeite chhinchhiah an nih bakah 2016 Identification kalpui laia, chhungkua la chhinchhiah lohte chu Identification ti leh tura ruahmanna siam a nih angin chhinchhiah tel an ni bawk.   Zirtawpni khan Panisagar Sub-Division hnuaia Relief camp pathum Kaskau, Khakchangpara leh Hamsapara-ah te enfiah hna hi thawh a niin Mizorama let duha hming pete hi Kaskau Camp atangin chhungkaw 174, puitling 797 leh naupang 340 an vaiin mi 1137 an ni a, tihian Kaskau camp atanga ni 2 chhung hian Mizoram let duh inziak lutte hi Mamit District atangin chhungkaw 367 niin puitling 1669 leh naupang 697 an vaiin mi 2366 an ni. Kolasib District chhunga awm tur inziak lut tawh te hi chhungkaw 27, puitling 158 leh naupang 36 an awm bawk a ni. Hamsapara camp atang hian 2016 a Identification paltlang lo chhungkaw 17 te chhinchhiah thar niin Khakchangpara camp atang hian Re-Identification chhungkaw khat leh 2016 Identification paltlang lo identified leh hi chhungkaw 5 an awm bawk. Kanchanpur Sub Division hnuaia Relief Camp pathumte Asapara, Naisingpara leh Hazacherra Camp-ah hian Naisingpara Camp atangin 2016 Identification paltlang lo chhungkaw khat Identified a ni bawk.   Reang (Bru) Mizoram mi leh sa Tripura camp a tanga lakletna tura endik hna Camp hrang hranga neih hi boruak tha tak hnuaiah neih niin nimin pawh khan chhunzawm leh a ni.