Bru lakkir an hlawhtling tawh dawn emaw tih laiin harsatna lian takin a dal leh ta tlat mai. Tripura relief camp-a Mizoram Bru awm mek tam tak chuan lak let an nih dan tur draft agreement chu duhloin an duh loh zia an auchhuahpui tawh a, hmun thenkhatah buaina tenau a chhuak tawh bawk a ni. Hemi anih vang hian Mizoram Bru Displaced People Forum hruaitu chu inremna ziak atang hian a inhnuhdawh phah bawk a ni. Bru lak let chungchang hi sawrkar lam chuan official-in MBDPF inhnukdawhna hi an hriat loh vangin inremna angin thawhzui a tum tih an sawi tawh bawk a. He inremna hi tihhlawhtlin ngei a nih theih nan hmalak zel an tum niin media lamah sawi a ni tawh bawk a.  Camp-a Bru te hi Kolasib, Mamit leh Lunglei district-a awm tura tih an ni hlawm a, district core committee on Reang din niin heng core committee 3 te hi an thu fel vek tawh bawk a ni. July thla tir khan Central sawrkar, Mizoram, Tripura leh MBDPF te chuan inremna lo ziak tawhin September 30 hma hian inla kir vek turin an lo ziak fel tawh a. Central sawrkar chuan Bru kir turte hnenah hian sum leh hamthatna tha tak tak tiamin tlangzarh a ni tawh a, hetiang leh Mizoram chhunga awm tawh Bru te hamthatna te an  inthat hleih nia ngai pawl an awm avangin hrut rual duh pawl an awm ta niin a lang a. Chanvo tha duh vein Bru te chuan ngiat an siam thar leh ta ni berin a lang a ni. Inremnaa lungawi lo leh hnuhnawh te chuan laklet an nih hnuah chhungkaw 500 tala awmkhawm an phut a, chhungkaw tin tan ram hectare 5 te, an dawn tur sum Nuai 4 chu kum 3 hnu ni lo bank-a dahluh te leh Development Council  dinte an phut bawk a ni. Sawrkarin Bru te thil dawn tur a tiam hi tha tawh tak a nih laia aia uchuak zawk an phut leh hi a mak angreng hle a, inhmun chhungkaw khat tana an phutte phei hi chu chu Zoram chhunga awmsa te pawhin an neih mai mai theih loh a ni a, chik peih tan chuan ngaihtuahna a kal thui thei khawp ang. A nihna takah chuan sawrkarin pek a tiam ringawt pawh hi Mizoram an chhuahsan hma ai khan tam tak tan chuan a tha fe tawh zawk a ni. Hetiang a nih alaia a thim a var pawh thlu loa inpek theih loh tura ngaih an phut lui tlat hi chu a dik lo hul hual a ni. An lo kir huna pek an nih tur te hi an pawm dawn lo tak tak a nih chuan ngaihdan hran neih mai te pawh a awl  duh dawnin a hriat ta e.