Aizawl; Tripura Transit camp-a Reang (Bru) la awmte la let tura inpuahchahna (6th batch repatriation) chu kalpui zel a ni a. Hemi chungchangah hian June ni 6, 2014 khan Mamit DC, K Lalthawmmawia hovin Mamit SP, Home Deptt. lam hotute, Nodal Officer leh DIPRO, Mamit te chuan North Tripura District Magistrate, Sandeep Rathod leh Tripura sorkar mi pawimawh dangte an kawm a. Bru lakletna chungchanga thawhho dan tur an sawiho. Bru ho an camp atanga an chhuahna tur motor leh venhimna chungchang sawihovin, Bru te lakkir hun atan June ni 17 leh ni 18 an ruahman nghal. Tripura sorkar nen inbiakna bawhzuiin nimin khan Mamit DC hovin a office-ah sorkar deptt. hrang hrang hnuaia officer ten Bru laklet thawh 6-na neih ni-a hmalak dan tur, lo dawnsawn dan tur leh a dawngsawngtu turte an ngaihtuah nghal a. Lo dawnsawnna hmun atanga an awmna tur khuaa hruai tur motor leh an chen lailawkna tur chungchangte an thlirho a ni. Mamit district atanga lo lut tur Bru-te hi Kanhmunah leh Zomuantlangah lo dawnsawn an ni ang a, heta tang hian Tripura Transit camp-a an awm hmaa an chenna Assembly Constituency-ah theuh hruai tura ruahman a ni. Tun tumah hian Bru lo let tur a hming inpete hi anmahni finfiah a chian phawt an ni a, hming inpe atangin chhungkaw 459 te chu laklet tur phawt an ni ang. ----------