Aizawl: Transport Department Director R. Remmawia chuan Supreme Court in  thupek a chhuah angin Bharat Stage IV motor lo chu April 1, 2017 atangin register a ni tawh dawn lo niin a sawi. Transport Department Director R.Remmawia chuan Central lam atanga dan lo kal loh theih loha zawm ngai a nih thu sawiin March 31, 2017 hmaa lei BS III motor te erawh chu register theih a ni dawn niin Zalen  a hrilh a. Ni 31 hnu lama lei a nih erawh chuan register theih a ni tawh dawn lo tih sawiin, "Thuthar a awm te a nih loh chuan khawng taka kalpui kan tum," tiin a sawi a. Transport hotute chuan Mizoram chhunga District Transport Officer zawng zawng pawh he thupek hi hriattir an nih thu leh Mizoram puma zawm a nih dawn thu a sawi a ni. Thudawn danin Supreme Court hian March 29, 2017 khan he thupek hi a chhuah a. Apex court hian April ni 1 atangin BS IV ni lo motor engmah register theih a ni tawh dawn lo tih sawiin motor siamtu company te'n BS III motor la hralh loh nuai 8 leh sing 2 lai mai thehthangna hun siamsak tura an ngenna pawh hnawl anih thu an sawi a. Supreme Court chuan he thupek hi a pawimawh zia an order chhuahah hian tarlang in, "Ram mipuite hriselna hi a motor siamtute sumdawnna nghawng tur aiin a pawi mawh zawk," tiin ziah a ni. Lirthei zuartute biak kual an nih laiin Bharat Stage III motor la hralh chhuah loh nei an la awm nual thu Zalen hrilh a ni a. Tata Motor zuartu Zothan Auto Works chuan stock an la neih nual thu sawiin heng lirthei la hralh loh te hi BS IV a siam anih dawn chuan company ah dah kir leh vek a ngaih dawn thu  an sawi a. Vespa scooter zuartu CK Cars chuan BS III scooter la hralh loh 28 an la neih thu sawiin, “Company lam hian March 31 hmaa lei te tan Rs 7000 discount an nih tur thu min rawn hrilh a, a bak chu company lamin tihtheih an neih loh thu min rawn hrilh,” a ti a, hmalak dan tur an la ngaihtuah mek niin an insawi bawk. Heng bakah hian Mana Motors leh LBS Suzuki te chuan stock an la neih thu leh heng stock te hi a hlawma registration an tih thu an sawi thung a, CK Hyundai erawh chuan an motor kawl lai te chu BS IV anih vek tawh thu sawiin heng bakah hian Aizawla lirthei zuartute chuan harsatna an tawk mek nia thu dawn a ni.