ZALEN Aizawl 27, 2025 : Mizoram atangin BSF Constable (GD) 300 lak a ni dawn a, Centre pathum - Serchhip, Aizawl leh Lunglei-ah atangin mi 100 theuh lak an ni ang. Vawiin khan hemi chungchang sawi hovin Serchhip DC Paul L Khuma, SP Gavit Gogna, BSF hotute leh mi pawimawh dangte Serchhip DC Meeting Hall-ah an thukhawm.

Serchhip Centre hian District pathum - Serchhip District, Khawzawl District leh Champhai District te a huam a. Aizawl Centre hian district pali - Aizawl, Saitual, Mamit leh Kolasib a huam a, Lunglei Centre hian district pali - Lunglei, Siaha, Lawngtlai leh Hnathial te a huam a ni.

Dilna form hi District DC office ah lak theih a ni a. Social media kaltlangin pdf thehdarh a nih bakah BSF Website link rectt.bsf.gov.in/static/bsf/pdf/180825_MC.pdf atanga download theih a ni bawk. 

NCC ‘C’ Certificate nei te tan 5% mark belh sak an ni anga, B Certificate nei tan 3% leh A Certificate nei tan 2% belh sak an ni ang.

Recruitment Centre-ah hian September 2 atanga September ni 18 (sawrkar chawlh tiam lohin) chhungin form fill up sa nen a centre theuh-ah kal tur a ni a, an form te endik sak an ni anga physical test atan admit card pek an ni bawk ang. Passport size photo bakah education certificate, ST Certificate leh Aadhaar/VoterID/Ration Card xerox copy ken tel tur a ni a. Heng xerox copy te hi mahnia attest (self attest) pawm a ni ang.

Physical Test hi September 23 atanga October 9 thleng neih tur a ni a. Written Exam hi October 18 ah neih tur a ni ang. Written Result hi October ni 22 ah puan a ni anga. Medical Exam hi October 27 atanga November 4 chhung neih a ni ang. BSF Constable a tling te result hi November ni 10 ah puan a ni ang.