Aizawl: Bible Society of India, Aizawl Auxiliary chuan kum 2015-2016 chhung khan Rs. 3,24,89,115 an hmuchhuak a, an target hi Rs. 86,59,115 in an khum a. India ram Auxiliary zingah an titha ber a ni. Bible Society of India, Aizawl Auxiliary hian kum 2015-2016 a an target chu Rs. 2,38,30,000 a ni a, kum liamta atang khan an kalphung hi thlakin a hmaa calender year January atanga December ni thin chu kum 2015-2016 atang chuan sawrkar pawisa kum angin March thla thleng a huam tawh dawn a ni. BSI Aizawl hian kum 2014 khan Rs. 3,12,49,955 hmuin target hi Rs. 12,39,160 in an khum tawh bawk a ni. Kum dangah pawh target hi khum thin tho mahse kumina an khumna a san bik chhan hi a hmaa thla 12 ni thin ah tun tumah chuan thla 3 dang (January, February leh March) a tel tak vang anih theih thu BSI thawktute chuan Zalen an hrilh. BSI Aizawl Auxiliary hian semchhuah (distribution) lamah pawh nasa takin hma an sawn tih Zalen an hrilh a, Bible bu pum, Thuthlung thar, Bible thuziak (tract), Bible comics sem chhuah lamah pawh an target chu 12.74% in an khum. BSI Aizawl hian kum 2015-2016 chhung khan Bible 71420 hralh an tum laiin bu 77706 an hralh a, thuthlung thar bu 2964 an hralh bawk. Distribution lamah hian India ram pumpuia target chu 29107633 anih laiin 30809642 semchhuah a ni a, target hi 05.85% in khum a ni. BSI Aizawl thawktute chuan India ram Auxiliary dang ngaihtuahin distribution lamah hmalak chak a harsa tih Zalen an hrilh a, "India ram hmun dangah chuan mihring an tam a, Bible leh tract te pawh semna tur a tam a, kan Auxiliary chhungah chuan mihring kan tlem avangin sem tam a harsa a. Mahse heti chung hian theihtawp kan chhuah ve zel a ni," an ti. Bible Society of India, Aizawl Auxiliary hian Mizoram bakah Tripura state, Cachar, Hailakandi leh Karimganj district te a huam a, Mizoram pawn Branch zingah Jampui, Silchar leh Agartala Branch ten an thawhhlawk thin hle.