Korean boy band lar BTS chuan May 31, 2022 (Thawhlehni) zan khan White House an tlawh a, US president Joe Biden leh mi pawimawh dangte nen hun an hmangho. White House hi an hmuh chak vanga tlawh sa tliah an ni lo - US-a East Asia miten dodalna leh enhran an tawh thin chungchang an sawiho a ni. 
     
US-ah khuan Covid-19 hri len hnuah East Asia mite beihna leh an laka pawikhawihna nasa takin a hluar a, hemi chungchang hi dawhkan khat kilin US president hi an sawipui a ni. Kum 79 mi Joe Biden chuan Asia miten harsatna an tawh thin chungchangah hian hma lakpui a inhuam thu a lo hrilh niin media te chuan an tarlang. 

An inkawmna hi White House briefing room a ni a, he lai hmun hi chu media mite pawhin an tlawh pawh theih loh hmun pawimawh bik a ni. He lai hmun an chhuahsan dawn pawh hian media ten zawhna an zawh phal sak an ni lo a, an thu leh hla kimchang hriat tur a awm rih lo.  

Nikum khan Georgia-a Asian hmeichhiate pakhat chu massage parlor-ah kahhlum a nia, he thil thleng hi BTS member - Jin, Suga, J-Hope, RM, Jimin, V leh Jungkook te chuan an dem thu an lo sawi chhuak tawh a, tun tuma an inkawm chhan pawh hi he thil thleng nen hian inzawmna a neih ngei rin a ni.