Manipur a Meitei leh tlangmi te inkara buaina chu reh deuh in a lang a, mipui pawhin dan pangngaiin nitin hna an thawk chho tan dawn ta a. Hetih lai hian a rukin boruak hi a la tang ru hle a, engtik hunah emaw alh chhuak leh mai thei in a la awm a ni.

Manipur buaina chungchangah hian Meitei leh tlangmi te hian tawlh an tum lo ve ve niin a lang a, thisen pawh a la chhuak leh ngei dawn niin a ngaih theih. He buaina thleng chungchangah hian khawi lam lam pawh an tanhmun hi a dik ve ve a tih theih a, chutih rual chuan Meitei lam hian an duhthlan sual an tuar ni berin a lang.

Mithiam te sawi dan chuan Meitei hian a tirah schedule tribe a awm an duh lo a. Mahse hun a kal zel a, eng emaw hna dil kawngah general a awm phai lam mite an tluk lo a, hna hmuh kawngah harsatna an tawh bakah schedule tribe ten hamthatna chi hrang hrang an dawn ang kha an dawng thei lo a. Tunah pawh Manipur a hnam tam ber ni chungin an ram 10% vel chiah an luah a, tlangramah awm dawn se dan in an khawsak a lo remti si lo a. Hei tak hi an tan chuan ngaimawh loh theih a ni lo a ni.

Manipur buaina thlenga Mizoram sawrkar hmalakna hi a lawmawm tak zet a. Tu mah thi emaw hliam emaw awm lova him taka a hruaichhuak thei hi a ropui tak zet a ni. Sawrkar mai bakah tlawmngai pawl, kohhran leh mimal tin te kan tangrual tih a hriat a. Kan unau te kan lo dawnsawn dan leh an tana kan inhuamna te hi a ropui in a chhuanawm tak zet a ni. Burma a ni emaw Bangladesh lama Zo hnahthlak te hian an inpui, an Jerusalem Mizoram an rawn pan tih hriain lo dawnsawn kawngah kan tanrual zel a pawimawh hle.

Manipur atang hian raltlan mi 4000 chuang an lo lut tawh a, an la rawn luh belh zel pawhin a rinawm. He buaina hian eng chen nge a awh dawn hriat a ni lo a, kan unau te lo tuamhlawm leh tanpui tur hian Mizo mipuite inhawng zau deuh deuh thei ila a duhawm hle.