- Ramchhana Hmar Ram changkang an tehna pakhat chu, a rama chengte an thianghlim em, an khawlai te a fai em tih hi a ni a, he tehna hian kan ram Mizoram hi eng din hmunah nge min hruai thlen ve ang? Tuna kan thlen chin hi kan hmalakna zawng zawng leh kan kut thlak tawhna te ngaihtuah chuan duh khawp loh a na hle mai. Aizawl khawpui chhung bik han thlur bing ta ila, Aizawl Municipal Corporation (AMC) kan neih hma ai kha chuan hma kan sawn tawh hle niin a hriat a; mahse, kan hma lakna hi a zuanin a zuang lo va, a kal det deta tun dinhmunah chuan hlawhtling turin a ke pen a sak rih hle, hei aia hmasawn tur hian sawrkar pawhin ke a pen thei a ni tih hi mipui lam pawhin kan hriat a, an lakah beisei kan neih a hun tawh hle mai. Kan ram khawpui berah furpui hun a lo thlen a piangin kan bawlhhlawh enkawl/paih dan dik loh vangin kan khawlaiah bawlhhlawh a luanin a luang kawi zei zuia, a rim lah chu an chhe thei em em mai leh nghal a, nitina veng hrang hrangah bawlhhlawh paih motor a kal chung pawha hetiang kan tawng fo mai te hi, mi mal tinte mawh chu ni mah se, a changtu department lam hi kan kawh rawn lo thei lo. Bawlhhlawh bikah hian kut kan thlak nasa hle a, kan khawpuiah ngei pawh vartian atangin kan khawlai phiat faitu hmunphiat (Sweeper) tam tak an awm a, kan khawpuia hmunphiatte hi AMC enkawl niin a enkawl tu AMC ni ringawt mah se, hlawh petu UD &PA department lam an ni leh tlat si te hian hmasawnna a ti muang a ni thei angem? Bawlhhlawh chung changa tun dinhmuna kan khawpui kan enkawl dan hi chu, chem tum pakhat mi pahnihin a fawng an vuana lo an vat ang deuh hi a nia, hetiang chuan hna thawh chak a harin an sah pawh a na duh lo viau ang. Mi pakhatin nilengin chempui kha hum law law sela, a hna pawh a chak zawk ngei ang. Kan khawpui chhunga, thianghlimna (Sanitation) chungchangah hian sawrkar department pawhin hma chu an la nasa, sawitawh angin AMC kan neih atang pawhin an chena ve viau chutih rualin kan lo bawlhhlawh nasat lutuk vang nge ni an hmalakna duh khawp loh a na rih hle mai. Tin, SIPMIU hmalaknain khawpui chhung veng hrang hrangah bawlhhlawh bawm sem a ni a tunah hian a dawng lo te hnenah sem chhunzawm zel a ni bawk, a tawihthei leh tawihthei lo dahna turin ruahmanna fel tak nen a sawngbawl dan te pawh in zirtir thlap a ni; mah se, tun din hmunah chuan SIPMIU hmalakna zawm a hlawh lo in an sum sen zozai hi a uihawm hial zawkin a hriat, veng hrang hrangah bawlhhlawh paih motor a lo kalin kan bawlhhlawh chhek khawlna chu Cement bag leh Arham bag te tho chu a la ni si. Sawrkarin an tih thei bakah veng hrang hrangah YMA leh pawl hrang hrangte hma lakna in kan vengchhung tih fai hnatlang kan nei fo bawk a, mahni in leh a vel vawng fai turin Local Council lam pawhin vengchhung mipuite hnenah ngenna a siam deuh reng bawk a, chutiang khawp chuan bawlhhlawh chungah hian kut kan thlak nasa tawh a. Amaherawhchu, tun thleng hian kan la inthian fai thei lo chu a ni si a; tunge mawhphura, tu tih dik lo nge niang? Mipuiin mawh kan phura chutih rual chuan, mumal tak leh felfai taka ruahmanna a awm loh avangin kan la inthian fai thei lo mai zawk niin a lang. Tuna kan kal dan, Public Private Partnership (PPP) mode hi AMC leh a hnuaia Local Council te’n theih tawp an chhuah hnua kan tawn san theih ber niin a langa thla khatah cheng nuai tam tak kan luanral tir a, chuti chung chuan kan la in paih fai zo thei lo chu a ni si a, SIPMIU lamin bawlhhlawh sawngbawl dan thar an tlangau pui mek hian a tak a chang thei a nih chuan, kan fai ve thei tawh mahna. Mipui lamin kan tih thei tawk kan tih hnuah AMC lam leh department lamin an mawng an tih rit lutuk chhung chuan faina hian min thlawh khum deuh reng mai dawn a ni, ka hlawhfa rawihte hlawh ka pek ringawta ka enkawl zui loh chuan, an lak atangin hna tha tak ka beisei ngam dawn em ni? SIPMIU, AMC leh department-in kil thum atangin hma an la meka, a hlawhtling a nih chuan a lawmawma, a hlawhchham erawh chuan dem chiah an hlawh chhuak ngei ang. Chuvangin hlawh pe tu khan enkawl ta maise, a nih loh chuan AMC kutah hian nghat law law se kan fai hma ber lo maw?