ZALEN, July 09, 2026 : Bualte khaw daiah hmun hnihah leiminin kawng a hnawhpin avangin khualzin tangkhang mi 300 chuang an awm mek.

Bualte YMA hruaitute hnen atanga ZALEN thudawn danin, nimin khan Bualte daia leiminin kawngpui a hnawhpin avang hian khualzin tangkhang mi 200 chuang an awm a. Heng khualzin tangkhangte hi YMA leh VC-te chuan BCM Biak Inah eirawng an bawlsak a, mimal inah an riahna tur an ruahmansak bawk a ni.

Tukin khan leiminin kawng a hnawhpinna inkar hmun dangah leiminin kawngpui a hnawhping leh a. Bualte khawtlang hruaitute chuan he lei minna thar hi Lawngtlai lam, an khaw pelh chiah (an khua atanga lang thei lo chin chiah)-a thleng a nih thu an sawi.

Tun dinhmunah hian khualzin tangkhang mi 300 chuang an awm tawh a. YMA leh VC-te hian eirawng bawlsak chhunzawm zelin, tukin chaw ei zat pawh mi 300 chuang an ni. Bualte khawtlang hruaitute chuan he leimin hi vawiin lamah pawh an thenfai hman an rin loh thu ZALEN an hrilh a ni.