Aizawl: Mizoram Pradesh Congress Committee (MPCC) chuan kumin budget pharh tak chu mipui pual budget ni lovin Finance Minister Zoramthanga pual budget a ni, an ti.    

Nimin Aizawl Press Club a chanchinbumite an kawmna ah MPCC thupuangtu Dr. Lallianchhunga chuan kumin budget ah Chief Minister chanpual ah sum dah hnem bik a ni tih sawiin, "Finance Department-ah hian Major Works-ah ringawt pawh cheng nuai 96249 dah a ni a, CSS (Nuai 35000) nen phei chuan cheng nuai 131249.99 lai dah a ni a. Hetih lai hian Department engemawzat (Planning, LAD, School Edn, H & TE, Agri, Horti,AH & Vety, RD, Transport, Tourism)-ah te chuan a taka hmasawnna hna thawhna tur Major Works-ah pawisa dahsak an ni lo thung a. Heng department changtu Minister-te hian hmasawnna hna thawh an duh a nih chuan Chief Minister leh Finance Minister ni kawp Zoramthanga hi nasa taka an tlawn a ngai leh dawn tihna a ni," a ti.

Sawrkar hna-thawk hlawh dah tlem anih avangin harsatna a thleng leh dawn tih sawiin Dr. Lallianchhunga chuan, "Sawrkar hnathawkte hlawh tur hi nikum lam aiin an dah tlem leh a. Kum kalta khan kum hmasa lama dah zat cheng vbc. 202 a an dah phak loh avangin hlawh lak chungchangah sawrkar hnathawk ten harsatna an tawk nasa hle a, hlawh an inlak chhawk zak zak a nih kha. Kuminah pawh hian nikuma dah zat an phak loh leh avangin sawrkar hna-thawkte hlawh lak chungchangah an buai leh hle tura ngaih a ni a. Mahni hna-thawkte hlawh pawh pe tha thei lo sawrkar kan hrawn mek hi a vanduaithlak hle a ni," a ti bawk.

Dr. Lallianchhunga chuan Mizoram State Health Care Scheme-ah dam lo bill pek loh cheng vaibelchhe 40 chuang a awm mek avangin chhungkaw sang tam takin harsatna an tawk mek nia sawiin, "Healthcare hian Finance Minister Budget Speech-ah pawh hmun a chang pha lo hi Congress Party chuan a mak kan ti takzet a. Hei hian MNF sawrkarin mipuite hriselna lam an ngaihthah zia a tarlang chiang hleah kan ngai a ni," a ti a. MNF sawrkarah pensioner-ten pension pawisa an lak theih loh vangin harsatna an tawk nasa hle niin a sawi bawk.

MPCC thupuangtu chuan tun tum budget-ah budget siamrem ngai, Supplementary demand cheng vbch. 6025.44 zet a awm nia sawiin, hei hi kum 2021-2022 Budget atanga chhutin 54.04% daih a ni a. Budget chanve aia tam siamrem ngaia a awm hian Budget pawn lama sum hman a tam zia a lantir a, hei hi thil tha lo tak a ni tiin, "Hei hian sum leh pai enkawlna kawnga MNF sawrkarin kalphung mumal an neih loh zia leh an hlawhchham zia a tarlang chiang hle a ni," a ti a. Congress sawrkar khan sum dinhmun a siamtha tih sawiin MNF sawrkar a lo pian hnuah hian Mizoram sawrkar leiba nasa takin a pung niin a sawi bawk.