ZALEN January 27, 2026: Higher & Technical Education Minister Dr. Vanlalthlana chuan tun tum Budget Session-ah Mizoram State University draft bill put luh leh luh loh tur chu Pathian chauhin a hria, a ti.

Dr. Vanlalthlana chuan Mizoram State University chu a kalphung leh a awmna te sawn a nih dawn avangin Drafting committee din thar leh vek a ni a, tunah hian hma lak mek niin a peih hun tur hriat a la hnih lo a, engmah sawi lawk theih a nih loh thu a sawi.

School Education Minister ni bawk Dr. Vanlalthlana hian vawiin khan a pisa-ah chanchinbumite kawmin Class 10 leh 12 result bu siam thar a nih dan tur te, kum 2027-2028 Academic session atangin school calender thlak a nih tur te, English Medium School-ah Home Language Day hman a nih tur thu te, Thla khatah ni khat tal Hindi Speaking Day hman a nih tur thu te a sawi a. Common uniform chu hman chhunzawm a nih dawn loh thu leh a duh tan erawh hman chhunzawm theih anih tur thu te chanchinthar lakhawmtute a hrilh bawk.