ZALEN Feb 17, 2026: March 16 thleng awh tur Mizoram Legislative Assembly 9-na thutkhawm vawi 6-na chu vawiin chawhma dar 10:30 hian Mizoram Legislative Assembly House-ah tan a ni dawn.

Vawiin session ah hian Governor Lt Gen (Retd) Vijay Kumar Singh chuan thu a sawi dawn a; tun thla Feb ni 26-ah kum 2026-2027 Mizoram budget chu Finance enkawltu chief minister Lalduhoma'n a pharh ang. 

Vawiin atanga Assembly thutkhawm neih turah nimin chawhnu dar 3 thleng khan House chhunga tawngka a chhan chi zawhna (starred question) 1,223 a lut tawh a, ziaka chhan chi (un-starred question) 407 a lut tawh bawk a, dan siam danglam tura rawtna (amendment bill) pathum leh bill pangngai pakhat a lut tawh bawk.

Hriat theih chinah bill lut tawhte chu - Law & Judicial department atangin bill pahnih - 'The Mizo Marriage Divorce Inheritance of Property (Amendment) Bill, 2026' leh The Mizoram Jan Vishwas (Amendment of Provisions) Bill, 2026 te, Finance department atangin 'The Mizoram Goods and Services Tax (First Amendment) Bill, 2026' te, Land Revenue & Settlement department atangin 'The Mizoram (Prevention of Public Land Encroachment) Bill, 2026' te a ni a; MLA 10 hnen atangin resolution 5 theuh, a vaiin 50 a lut tawh a ni.

#ZalenNews