Aizawl; All Mizoram Farmers Union (AMFU) chuan Mizoram a buh thar a tam theihnan hmalak an tum tih an sawi a, leilet a siam theih te chu siam vek tur leh thingtlang loneih lamah pawh uar zawka hmalak an tum tih an sawi. Nimin khan Aizawl Press Club ah thuthar lakhawmtute kawmin AMFU hruaitute chuan kum 2015-2016 chu 'Buh thar tam kum' atan an puang tih an sawi a. AMFU President Joseph H.Thanzuala chuan tunhma chuan hemi kawngah hian sawrkarin hma la in mipuiin an tawiawm thin a, mahse tunah chuan mipui lamin hma la tanin a tul hunah sawrkar chu tawiawm (co-operate) turin an sawm tawh dawn niin a sawi. AMFU hruaitute chuan November ni 12 hian Vanapa hall ah an dincham vawi 20-na lawm an tum tih an sawi a, hemi ni atang hian green revolution movement hmalakna thar tur 'The New Economic Policy' an kalpui tan dawn tih an sawi bawk. AMFU hruaitute chuan Mizoram Mau te tangkai zawka hman anih theih nan leh man man zawka hralh anih theihnan paper mill din turin sawrkar an ngen tihn an sawi bawk. AMFU hi November 12, 1994 khan mi 74 kalkhawm ten Co-operative hall, Babutlang ah an din a ni a, tunah hian district headquarters 7, Sub Divisional Hqrs. 15 leh Branch 750 an nei mek a ni.