ZALEN March 5, 2026: Supply minister B Lalchhanzova'n buhfai bo thlau tur quintal 82,000 bawr vel hum tawhah an inngai tih house a hrilh.

Vawiin assembly budget session zawhna leh chhanna hunah memberte zawhna chhanga he thu hi sawiin, supply minister chuan, retailer te hnen atangin mi zawng zawngin ration buhfai an khul vek lo tih an hriat thu leh khul loh te pawh tun hma atanga an tih dan thin angin retailer ten an tih riral thin thu a sawi a. Chu chu sawrkar tan thil tha tak a nih loh thu a sawi.

"Department chuan hei hi stock angin lo vawng tha sela, a thla leh a an sem atan lo hmang rawh se kan ti a, theihtawp kan chhuah, retailer te pawh thawhpui an nuam, hma kan sawn viau tawh," supply minister chuan ti bawkin, he kalphung vang hian buhfai bo thlau mai tur quintal 82,000 bawr vel hum tawha an inngaih thu leh hetiang kalphung hi chu khawvel huap leh India ramah pawh tarchhuah tlak a nih thu a sawi a, he hmalakna hi kum 2024 October thla vel atanga kalpui tan a nih thu a sawi bawk.

#ZalenNews