Aizawl September 23, 2024 : Sawrkar laipuiin mirethei chhungkua nuai 600 tana kumtin buhbar (Rice/Wheat/Millet etc.) atana cheng nuai 72 an ruahmanna programme, Targetted Public Distribution System (TPDS) hnuaia beneficiary-te chanvo leh an harsatna chhawk zangkhai dan (Grievance Redressal) chungchang inhrilhhriatna (Awareness Campaign), Vanapa Hall, Aizawla neih chu vawiin khan Supply Minister B. Lalchhanzova chuan a hmanpui.

TPDS hnuaia beneficiary te chanvo inhrihhriatnaah hian AMC Area huamchhunga Local Council leh Retailer ni mek bakah CYMA, MUP leh MHIP aiawh bakah NGO thenkhat te sawm an ni a, CYMA aiawh erawh an kal lo.

Kalkhawmte hmaa thu a sawinaah B. Lalchhanzova chuan, "Tute pawh hi mahni zawn theuhah vantlang tana tangkaina nei thei vek leh chanvo pawimawh tak kan nei a. A bik takin retailer-te chu sawrkarin an tanghma a ngai em em a ni," tiin, sawrkarin TPDS chungchanga hma a laknate kalkhawmte hmaah hian sawi.

Buhfai rate chungchang sawiin, Ration card var hmangte tana buhfai KG-a Rs 30 ni tawh tur chuan Mizo-na thinlung chawk thovin, rualkhai leh felfai zawka an kal phah ngei a rin thu a sawi a. TPDS beneficiary-te thliar fel dan tur chungchangah pawh sawrkarin ngaihtuahna nasa tak a sen thu a sawi bawk a ni.