Aizawl July 5, 2024 : Vawiin khan Mizo Hnam Rûn-ah chhung inkhawm neih a ni a. MNF General Headquarter NCC member Lalrintluanga Sailo, MLA chuan thu sawiin, ZPM kaihhruai Mizoram sawrkarin Ration Buhfai (card var) man ti to a, POL atanga chhiah an tihsan chungchang a sawi.

Rintluanga chuan, "Mipui nawlpui, sawrkar hnathawk awm ve lohna chhungkuate pawhin rualkhai taka sawrkar zar kan zo ve theihna, UT kan nih lai atang tawh a kum 51 zet Buhfai subsidy a kan lei thin KG 1 Rs. 15 atanga a let thawk Rs. 30/-a ti to ta mai hi a makin, a pawi a ni. Tin, POL atanga chhiah lak a ti sang te, inrenchemna kalpui inti si a, thaba rulhna nia insawia sum tam tak senga Lunglei-a Council of Ministers an va thukhawm te kha 'sum tam tak ai a hmingthatna thlang zawk' inti Party te thil tihah chuan a awm lo hle a ni," a ti.

Rintluanga chuan Remna Ni-a Chief Minister Lalduhoma thu sawi sawizawmin, "India nen kan inremna point 17 te kha Pu Lalduhoma leh Pu Laldenga duan dun ni lovin ramhnuai sawrkar a Cabinet ten an duan a ni. Kan CM hi a party awmna a sawn apiangin remna chungchanga a thusawi a dang zel thin a; chuvangin Inremna chungchang hi sawi ve tawh lo se ka duh," tih a sawi.

Rintluanga chuan, MNF chu Hnam Party a nih angin thawhhona tha tak nei a, taima tak a ram leh hnam tan a thawk chhunzawm zel turin Party mite a fuih bawk.