Aizawl: Tun hnaia MIZOFED in buhfai a supply zinga engemaw zat chu a that tawk loh avangin hnawl a ni a, buhfai an hnawl hi truck trip 28 nia thudawn a ni. Food, Civil Supplies & Consumer affairs Deptt. hotu ten Zalen an hrilh danin tunhnaia Zuangtui godown a buhfai an dah tur thenkhat chu mipui ei atan a that tawkloh avangin an thawnkir tih an sawi a, mipuiten buhfai tha an ei ngei theih nan theihtawpin hma an la zel dawn niin an sawi bawk. FCS&CA hotute chuan tunhnaia hmun thenkhata sem buhfai te chu a that tawkloh avangin pawi an ti hle tih sawiin november ah chuan buhfai tha zawk an sem theih an beisei tih an sawi bawk. Buhfai supply-tu MIZOFED Chairman K.Laldawngliana chuan an hnuaia supply-tu mi thenkhatten buhfai tha tawk lo an supply chu pawi an ti hle tih Zalen a hrilh a. Sawrkarin a supply na man Rs. 2500 atanga Rs. 2750-ah a tihsan hnu pawha an hnuaia contractor-te zingah buhfai chhia supply an awm leh chuan an tihtawpsak dawn nia sawiin tun hnuah chuan a chhia a awm tawh loh a beisei thu leh mipuite pawh venpui tura a duh thu a sawi bawk. MIZOFED hian a tlangpuiin thla khatah quintal 70,000 vel an supply thin a ni. Mizoram sawrkar chuan FCI atangin buhfai hi quintal-ah Rs. 3364.23 (economic cost)-in a lei thin a, Mizofed atang hian quintal ah Rs. 2750-in a lei a,quintal khat zela a inthlauhna hi Rs. 614.23 a ni. FCI hi an kudam atanga lak a ngai a, Mizofed erawh chuan Zuangtui kudamah an dahsak thin.