Tyson Fury nena a tum thum nana an inhnek tuma Fury-a’n a knockouttheih nachhan chu, Deontay Wilder khan a lu hmanga Fury-a kut tum a bum thiam tawk loh vanga tlawmah Saul ‘Canelo’ Alvarez chuan a ngai. 

Kan hriat angin WBC heavyweight title an inchuhna kawngah a tum thum nan ‘Bronze Bomber’ hi round 11-na ah hneh loh la tawng lo ‘Gypsy King’ chuan a hnek tlu a ni nih kha. American Wilder hi tum 43 a inhnek tawhah tum thum chiah a la tlawm a, Pathianni liam taa Las Vegas-a a tlawm kha Fury-a laka a tlawm tum hnihna a ni. 

2020 February thla khan Wilder hi Fury-a'n alo hnek thal tawh a, hemi tum pawh hian Wilder hi a chetha hmasa zawk a, round li-naah phei chuan a hnek tlu ve hial a, mahse Fury-a rawn kir leh kha a tuar ta lo mai pawh a.

Canelo, hi pound-for-pound boxer zinga tha ber pawl a ni a, a rin dan chuan Wilder khan a lu hmanga Fury kut tum kha bum thiam hret se, hneh theihna hun tha a nei a, mahse, 'Bronze Bomber' kha Fury-a'n a bawh-buai hnehin a kut tum lakah khan a inthiar fihlim zawh loh vangin atan a pawi niah a ngai. 

Mexican boxer hi a weight-ah hun rei tak chhung a champion thei a, a hnek thiamna piah lamah a defensive skill tha lutuk kha a dinchan thinna nia ngaih a ni. 

Mexican fighter hian Podcast kal tlangin Brain Custer a hnenah,“In hnek ropui lutuk a ni. Wilder khan thiam thil tlem leh move dang deuh a mamawh belh niin ka hria. Midang kut tum bum kawnga harsatna kan neih hi chuan inhnek a harsa thin. Chuvangin, fighter tha tak Fury khan a hneh phah niin ka hria," a ti.