Aizawl: Aizawl Municipal Council chuan Rangvamual a Ch Saprawnga Truck Terminal bulah bungraw dahna in a sa mek a, he in hi peih anih hun chuan bungraw phur truck te chu Aizawl lut lovin an thilphurh te helai hmunah hian an dah tawh dawn a ni. Zalen-in AMC thawktute hnen atanga thu a dawn danin bungraw dahna in hi Rs. vaibelchhe 2.49 sengin NextComm Consultancy Firm chuan 2.12.2014 atang khan hna an thawk tan a, ruahman dan chuan 1.12.2016 ah zawh a ni ang. He in hi peih anih hun chuan bungraw phur truck te chu Aizawl lut tawh lovin helai hmunah hian an bungrua te hlan a ni ang a, helai hmun atang hian motor te hmangin Aizawl ah phurh luh leh thin a ni ang. Ruahman anga thil kalpui theih anih chuan mi tam tak tan eizawnna thar siamsak anih dawn bakah Aizawl Traffic jam nasa taka a tih ziaawm beisei a ni.