October 8, 2023; Mizoram mamawh bungraw phurtu inzawmkhawm, Joint Action Committee chuan Mizoram ei leh bar lakluhna kawng chhe lutuk siam that phutin naktuk Thawhtanni atangin Sairang leh Vairengte inkarah tlan rih loh an tum.

Mizoram Truck Owner Assn. President B. Lalzarzova chuan tunah hian Mizoram ei leh bar lakluhna kawng - Sairang leh Vairengte inkar, Kawlkulh atanga Hliappui, Kawlkulh atanga Tuichang te bakah Aizawl leh Imphal inkar te chu a chhe nasa hle, a ti a. Kawng chhe zual tal siam that a nih loh chuan naktuk Thawhtanni atangin bungraw phur motor zawng zawng Sairang leh Vairengte inkar leh Manipur lam atanga châk lakna kawnga tlan thin te an tlan dawn lo a ti a. An hmalakna zawmin Kolasib Maxi Cab te pawhin tlan loh an tum tih a sawi bawk.

An President sawi dan chuan Mizoram kawng chhe chungchang hi thuneitute hnenah an lo thlen tawh thin a; sawrkarin a thawm that mai beiseiin hun rei tak an nghak a, hmalakna engmah a awm mai loh avangin tun dinhmun hi an thleng ta a ni. Kawng chhiat avangin lirthei tam tak a che sual a, thenkhat a chhiat phah a, he’ng harsatna hrang hrang thleng avang hian kawng chhia chu naktuk zing dar 7 atangin zawh rih loh phawt ni se, tlanna tlaka thawm that a nih hma loh chuan kawng chu zawh rih loh mai ni se, an ti a ni.

Joint Action Committee chuan an hmalakna chu Mizoram kawngin hma a sawn theih nana ti an nih avangin thlawp theuh turin mipui an ngen a ni.

Joint Action Committee-ah hian Mizoram Truck Owners’ Association, Truck Drivers’ Association, Mizoram Tippers Driver and Owners Association, Mizoram Oil Tanker Drivers Association leh Kolasib District Drivers Welfare Association te an tel.

Hetihlai hian nimin tlai khan Chief Minister Zoramthanga hovin Mizoram PWD hotute leh Joint Action Commttee For Plyable Road chuan Lailapur leh Sairang inkar kawng chhia siam that thuai dan tur sawihovin hmalak dan tur hrang hrang an duang.

RUAHMANNA SIAM DAN :

1. Lailapur leh Sairang inkar kawng chhe zual lai thawm that hna tha tak leh chak zawka thawh theih a nih theih nan leh motor lian tlan ten kawngpui siam sa an tih khaihlak loh nan helai inkar kawngah hian Dt.09.10.2023 (Thawhtanni) atangin motor lian tlan rih loh nise.

2. Kawng siam that hna thawk nghal tur hian NHIDCL lamin Seling leh Serchhip atangin Truck 30 (Sawmthum) lung phur chu Dt.08.10.2023 (Pathianni) ah hnathawhna tura rawn dah tan tura tih an ni.

3. He kawng repair hna hi Dt.09.10.2023 (Thawhtanni) atangin chak taka hna thawh tan tum a ni.

4. Repair hna hi a chak thei ang bera thawh tum a ni a. Motor lian kal theiha siam a nih veleh motor lian pawh tlan chhunzawm leh a ni ang.

5. Tin, Teirei lei, Darlaka mi leh Bairabi Zamuanga mi thawh mek hi hna chak taka thawk chhunzawm turin PWD-in Contractor-te hriattir ni se.

6. Tuichang to Kawlkulh kawng NHIDCL-in an enkawl hi siamthat vat a nih theih nan DC, Khawzawlin NHIDCL leh PWD hotute kokhawmin hmalak vat dan tur relpui se.