ZALEN September 18, 2025 : Commissionerate of State Tax chuan September Ni 22, 2025 atanga hman tur India ram puma GST rate tihdanglam leh a kaihhnawiha hriat turte inhriattirin vawiin khan Mizoram puma Taxation Officer-te tan Refresher Workshop on GST hun chu Taxation auditorium, Mineco-ah an hmang a. Taxation Commissioner chuan GST tih hniam avangin bungrua leh service man pawh a tlakhniam a ngai a, tihniam lo report an awm chuan action an la dawn tih a sawi.

Workshop hi Hybrid mode-a kalpui niin, Aizawl chhunga awm Tax Official-te chu a hmunah kalin District dang zawng chuan Online mode in an zawm thung a ni.

Workshop ah hian Commissioner of State Tax H.K. Lalhawngliana chuan thu sawiin, “GST Council chuan September Ni 3, 2025 khan bungrua leh tha (service) hrang hranga hralhna a GST rate thar hmanna tur a rel a. GST rate thar hmanga India ramin tax reform a kalpui tur hi September Ni 22, 2025 atanga hman tan tur niin GST rate hlawm li lai awm thin chu hlawm lian hnih (two slabs)-ah kalpui a ni tawh ang a, bungrua leh tha (service) hralhnaa GST rate chu 5% leh 18% a ni tlangpui tawh ang. Vaihlo leh a kaihhnawih thil ah 28% GST lak a ni ang a, Lirthei thenkhatah 40% a ni tawh bawk ang” a ti a.

GST rate tihdanglam tur hi a tlangpuiin a hniam zawnga a kal dawn avangin thil man hniam phah tur tam tak a awm dawn a. Commissioner of State Tax H. K Lalhawngliana chuan, “Sawrkarin GST rate a tihhniam hian a tum lian tak pakhat chu mipui nawlpui banphak leh man tlawm zawka lei theih tura thil man siam that a ni a. GST hniamna tur bungrua leh tha zawrhna lama sumdawngte chuan a zawrhna man an tihniam ngei tur a ni a, hemi kawngah hian Sawrkar chu a thikthu a chhe hle dawn a ni. September Ni 22 hnu lamah chuan GST rate tih hniamna bungrua leh tha (service) zuar te zingah a man ti hniam lo report lut a awm chuan Anti Profiteering Measure hmanga action lak zel tur a ni ang,” a ti.

Commissioner chuan, “He GST reform atan hian Taxation officer te pawh chak lehzuala hna thawh a tul dawn a. Tin, sumdawngte pawhin an tih ngei ngei tur - anmahni dawrtute hnenah Tax Invoice an pechhuak tur a ni," a ti.