Aizawl: Hachhek Bial Kuhva Chingtu Pawl (HBKCP) hruaitute chuan Zirtawpni zing dar 3 vel khan Zamuang to Bairabi road-ah Myanmar kuhva ro phur truck pathum an man a, Zawlnuam Police-ten pakhat an man bawk.

Report an dawn bawhzuia kuhva phur truck pathum an mante bakah hian truck pakhat chu a tlan tlang hman a. Zawlnuam lam hriattir nghal niin, Zawlnuam Police-ten kuhva ro phur truck pakhat hi an lo man leh ta a ni. 

Zamuang to Bairabi kawnga an man truck pathumte hi a khalhtu Mizo vek an ni a, motor khalhtu pathumte chuan Aizawl World Bank Road atangin motor dang atanga an phurh chhawn niin an sawi a. Pakhat chuan Lengpui khuaa building pakhat atanga a phurh chhawn niin a sawi thung a. An zavai hian Kanhmuna dah turin a neituten an hrilh thu an sawi hlawm.

Kuhva ro an mante leh motor khalhtute bakah an phurhna motor-te hi Kawrthah police station-ah HBKCP hruaitute chuan an hlan.