ZALEN January 27, 2026 : School Education Minister chuan school session thar 2026-2027 atangin by-heart system tihbo nan MBSE pawl 10 leh pawl 12 Board Exam result buah Top Ten leh Division tihlan a ni tawh dawn lo a ti. 

Minister Vanlalthlana chuan vawiinah khan a office-ah press conference neiin Department-in 6th Quarterly Review Meeting a neih leh 14th Mizoram Education Reforms Committee Meeting-in zirna leh zirlaite tana tha zawk tur thil tam tak a ngaihtuah hnuah MBSE pawl 10 leh pawl 12 Board Exam result buah Top Ten leh Division tilang tawh lo turin thutlukna an siam a ti a. School hming hnuaiah zirlai pass te hming leh roll number chiah tarlan a ni tawh dawn a, zirlai ten an mark hmuh dan kimchang chu MBSE website atangin an hmu thei vek a, Merit List leh rank certificate chu MBSE-in a diltute hnenah a pe chhuak thei reng dawn tih a sawi. 

He hmalakna hi inelna thianghlim a nih rualin zirna tha zawk a awm theihna atana an tih a nih thu Minister chuan a sawi a, school tam takin Board Exam result tha an duh avanga pawl 9 leh pawl 11 zirlai hlamchhiah a, pawl 10 leh pawl 12 zawhna hlui zir a, naupangte by-heart system-a an kaltir thin tihbo nan leh naupangin a thluak leh a rilru a hman theih tak takna, competency based learning hmanga zirlaiten competitive exam hrang hrang NEET, JEE leh a dangte an hmachhawn theih nan hetiang hian an kalpui tawh dawn tih a sawi a ni.

Education Minister chuan school calendar tharah chuan pawl 10 thleng tan school kal hun chu January atanga December a ni dawn a, pawl 11 leh pawl 12 school kal hun erawh April atanga March a la ni ang a ti bawk.