Aizawl; April ni 11, 2014-a Mizoram Lok Sabha MP seat khat atana inthlanna vote tla, May ni 16-a chhiar zawh takah chuan Lok Sabha MP term liam taa MP, CL Ruala chu Congress party ticket-in Mizoram MLA bial 21-ah vote hmu sang berin hnehna a chang a, United Democratic Front-in an thlawp, Robert Romawia Royte chuan MLA bial 19-ah a hmu sang ber ve thung a, Aizawl khawpui chhung MLA bial 11-ah vote a hmu sang ber vek bawk. Lok Sabha MP vote chhiar zawh takah hian state sorkara rorel lai, Congress party MLA te bial ni meka UDF candidate-in vote a hmuh hnem berna bial 13 awmin, hengte hi PC Zoram Sangliana, MLA bial Kolasib te; Home Minsiter R Lalzirliana bial, Tawi te; Lalrinliana Sailo bial, Tuichang te; Parliamentary Secretary Joseph Lalhimpuia bial Lunglei East te; Chalrosanga Ralte, MLA bial Lunglei West te; High Powered Committe (Lunglei) Vice Chairman, S Laldingliana bial Lunglei South te; Parliamentary Secretary H Zothangliana bial Lawngtlai East te, Aizawl khawpui chhungah Minister Lal Thanzara bial Aizawl North-II te; Minister Lalsawta bial Aizawl East-II te; Dy. Speaker R Lalrinawma bial Aizawl East-I te; R Vanlalvena bial Aizawl South-I te; Parliamentary Secretary Lt.Col.ZS Zuala bial Aizawl South-II leh Parliarmentary Secretary KS Thanga bial, Aizawl South-III te a ni. MLA bial anga khaikhinin rorel lai Congress party hian seat 17 hloh ang an ni a, UDA (MNF+MPC+MDF) MLA 6 zinga pakhatin bial 1 an hloh ve thung a, hei hi Tuikum bial niin, he biala MLA ni mek chu Er. Lalrinawma, MNF a ni. Hetih lai hian bial mala Congress MP candidate CL Ruala leh amah hnaih bertu inthlauhna vote sanna ber chu Tuichawng bialah a ni a, he bialah hian CL Ruala'n vote 12,957 hmu in Robert Romawia Royte in vote 4749 a hmu a, an inthlauhna hi vote 8,208 zet a tling.