Aizawl: MPCC General Secretary leh Central YMA General Secretary hlui ni bawk C.Lalruata (72) chu nimin chhun dar 12 khan an chenna Ramhlun South ah vuiliam a ni a, vui inkhawmah hian Minister, MLA leh mi pawimawh thahnem tak an tel. C.Lalruata hi Mizoram UT Assembly inthlan hmasak ber 1972-ah Lungpho bial atangin Mizo Union ticket-in MLA atan thlan tlin a ni a, kum 1972 - 1974 chhungin Mizo Union-ah Secretary a ni a. Kum 1986 - 1987 chhungin MNU General Secretary, 1987 - 1988 chhungin Democratic Party General Secretary te ni tawhin, MPCC Secretary-ah tum hnih leh, General Secretary hna tum nga aia tlem lo a thawk tawh a. Kum 2008 - 2013 chhung khan MIFCO Chairman a ni a, kum 2014 tawp thleng khan MPCC Media Department-ah Chairman a ni a, MPCC thupuangtu Spokesperson a ni reng thin bawk. Khawtlang leh kohhranah pawh inhmang tak a ni a, Ramhlun Branch YMA President a nih tawh bakah kum 1971 - 1973 chhung khan Central YMA-ah General Secretary a lo ni tawh bawk.