Sawrkar laipuia rorel mek BJP kaihhruai NDA sawrkar chuan hun hmasa lama an tih puitlin theih loh Citizenship Amendment Bill (CAB) chu an sawrkar chhungin tih puitlin ngei an tum thar leh a. Sawrkar thar a din hnua President in Parliament a thu a sawina hmasa ber Ningani kaltaah pawh chiang takin a sawi a, chuvangin CAB chungchanga kan hawilam tur chu a chiang ta viau niin a lang.

Citizenship Amendment Bill (CAB) hi eptu party te chuan an duh lo hle a. India ram state hrang hrang zingah hmarchhak bial te hi a duh lo langsar an ni a, a chhan chu kan chheh vel ram dang, a bikin Bangladesh atanga ramdangmi thahnem tak an lo luhna kawngka a inhawng dawn nia a lan vang a ni. Hmarchhak bial mipuite hlauhthawn hi thil awm tak a ni a, Assam state hian Bangladesh atanga raltlan lut te chu an tuar ber niin a lang a, mipui maktaduai engemaw zat an lut a. Heng mite hi hnawhchhuah tumin zirlai pawlte leh sawrkar pawhin hma la thin mah se awmzia thui tak a nei thei tawh lo. Assam bakah Meghalaya, Arunachal Pradesh leh Mizoram te chu a tuar zual te an ni.

Citizenship Amendment Bill (CAB) chungchangah hian Mizoram Rajya Sabha MP Ronald Sapa Tlau chuan Mizoram mipuite chu CAB dona atana inring turin a chah a. CAB chu atom bomb aia hlauhawm nia sawiin Mizoram hma lam hun chu Parliament-ah a innghah thu a sawi bawk a ni.

Tun dinhmunah chuan BJP kaihhruai sawrkar hian Lok Sabha-ah chuan member an ngah tawkin CAB hi an pharh hunah pawh Lok Sabha ah chuan harsatna an nei dawn lo hle tih chiang takin a hriat a. Hetih lai hian Rajya Sabha ah erawh chuan member nei tlem zawk an nih avangin harsatna chu an la tawk thei a, engpawh nise Modi kaihhruai sawrkar hian he bill hi kaltlangpui a tum tak tak anih chuan Parliament joint session kovin he bill hi a tlang ngei a rinawm a ni.

Citizenship Amendment Bill hi Mizo mipuiten kan duh lo a, campaign neih lai pawha political party hrang hrang te sawi lar ber a ni a, tu party mahin an duh loh thu leh an dodal tur thu an sawi vek a ni. Tun tumah pawh hian sawrkar laipuia rorelna fawng vuan mektu NDA-ah hian Mizorama rorel mek MNF te chu an tel a; chuvangin, Lok Sabha MP C.Lalrosanga hawilam hi mipuiin an thlir bik tih an in hriat a pawimawh awm e.

Citizenship Amendment Bill (CAB) hi Mizoram mipuite hian kan duh lo tlang vek a, chuti chung chuan keini lo do ve hian awmzia a awm thui dawn lo hle niin a lang. Chuvangin lo pawngpaw do viau ai chuan CAB an pass huna kan himna tur lo ngaihtuah lawk leh lo inbuatsaih hi a finthlak zawk awm e.