Aizawl September 4 2022 : Nimin khan I&PR Minister Lalruatkima chuan V. Kungtea (Rairahtea), Saizawh West lehkhabu ziah ‘Cabin Kamchhuak’ chu Pi Zaii Hall, Synod Conference Centre, Aizawl-ah a tlangzarh.

Lalruatkima chuan, "‘Cabin Kamchhuak’ V. Kungtea (Rairahtea) ziah, a tlangzarh thei chu lawmawm a tih thu a sawi a. Minister chuan zepthu a cheng lo a, a ziaktu hi vohbik tih te zinga mi a ni a, vohbik ni chunga hetiang lehkhabu a chhuah thei hian ngaihtuahna a tikal thui a, midangte tan chona nasa tak a pe a, Pathian hian a vohbik tih hi a tichiang hle a ni," a ti. 

Ruakima chuan, Mizote hi hnam mak tak mai, lungleng thei tak, pi pute sulhnu han en leh han belhchian pawh hian, chhui zui theih tur leh thawnthu buatsaihna tham tling tak mai chanchin hi a phenah a lo inphum fo mai thin a, hei hian Mizo Literature pawh a tihausain, a tihlu zual hle a ni a ti a. Theih phei se chu Mizo thawnthu tam tak hi Sap tawng (English) hian siam thei phei ila chu, Sap pachal tam tak mittui ti tlatu hi a tam ngawt ang, a ti.

I&PR Minister chuan Mizo thalai, thangtharte hian Mizote mahni kutchhuak ngei hi nasa zawkin an la hlut tulh tulh dawn a, chumi hunah chuan heng ziaktu thiam leh lar tak tak te kutchhuak hi tun aia nasa zawk hian khawvel hmun hrang hrangah hnam dang te hmuh leh chhiar theih tur pawhin kan la pho chhuak ngeiin ka ring bawk a ni, a ti. Thil chhinchhiah tlak te ziaka lo dah thin hi thil pawimawh tak mai a ni a, Mizo ten mahni tawng ngeia ziah/phuah (literature) humhalhna kawngah thleng hian nasa takin hmasawn zel a tul hle bawk a ni a ti.