Aizawl: MNF Sr Vice President, Dy CM ni bawk, Tawnluia’n cabinet meeting-in Assam Rifles rama LSC neite cancel turin a ti tawh niin a sawi a. Hetihlai hian tun dinhmunah AR ram chhungah LSC nei mi 61 awmin mi pariatin an LSC an surrender tawh.

MNF Sr Vice President chuan March 24, 2023 khan Mizo Hnam Run, Lungleiah thuthar thehdarhtute kawmin Assam Rifles sawn chhuak tura Laldenga hma lo lak tawhna chu bawhzui zel a ni tih a sawi a. Chief minister hmalakna avangin AR an inthiar chhuak tan tih a sawi bawk.

“AR chhuahsan tur ram hi mi mal kuta a luh loh nan dan siam a nih mai bakah cabinet meeting pawhin AR rama LSC neite cancel hi a rel tawh a. AR ram chhuahsan tur hi mipuite tan tangkai taka hman a ni dawn a ni,” a ti.

ZALEN-in document a neiha a lan danin Assam Rifles ram chhungah LSC nei mi 61 an awm a, mi pariatin an LSC an surrender tawh. LSC surrender tawhte chu - Lalnunmawii, Baktawng; Lalzarliana, Bawngkawn South; Thanpari, Khatla; Dr. Sangzuala, Zarkawt; Rochhunga Ralte, Electric Veng; Lalhuthanga, Dawrpui Vengthar; K Sangnghaki, Bethlehem leh V. Thlanga, Bethlehem te an ni.

AR luah ram humhalhna turin sawrkarin ruahmanna a siam a, chumi atan chuan ‘The Mizoram (Registration on Use of Transfer Land) Act, 2002 chu Mizoram Gazette Dt. 19.12.2002-ah notify a ni tawh a, he act effective date atan hian ni 23.11.2005 chu official gazette hmangin ruat a ni tawh a. Hengte bakah hian tun hnai budget session neih zawh takah khan, ‘The Mizoram (Restriction) on Use of Transfered (Land) Amendment Act, 2023’ pass a ni bawk.