ZALEN October 13, 2024 : Mizoramin airport a neih chhun, enkawltu dang hnena hlan/tihral chungchang chu a zirchiang tura din working committee-in an report an thehlut tawh a, cabinet meeting hmasa berah ngaihtuah a ni dawn nia thudawn a ni.

Lengpui Airport hi Airport Authority of India (AAI) emaw, third party hnena hlan/tihral tum chungchangah hian zirchiang tur, Working Committee to Look into the Maintenance and Management of Lengpui Airport chu February 1, 2024 khan din a ni a. Committee hian an report chu chief minister hnenah July 31, 2024 khan an thehluh tawh.

ZALEN thudawnnain a sawi danin, a zirchiang tura din working committee report hi cabinet meeting hmasa berah ngaihtuah a ni dawn a, an thuchhuak azirin Lengpui Airport kalpui zel dan tur a chian theih rin a ni.

January 1, 2024 atanga July 31, 2024 chhunga Lengpui Airport atanga revenue hmuh zat chu Rs. 4,38,98,500 a tling.

Hetihlai hian NGO Coordination Committee chuan August 9, 2023 khan thuchhuah siamin, Indian Air Force (IAF) kuta Lengpui Airport hlan an remtih loh thu an lo puang tawh.

NGOCC hruaitute Central YMA Committee Room-a thukhawm chuan Lengpui Airport chungchang an ngaihtuah a; thuchhuah siamin, “Mizoramin kan thil neih hlu em em leh neih chhun, Lengpui Airport hi IAF kuta hlan tumna a awm niin kan hria a, NGOCC chuan hlan a remti lo a ni,” an ti.

MNF party pawhin IAF hnena Lengpui Airport hlan an duh loh thu an lo puang tawh bawk a. “Mizoram tana ro tling ZPM sawrkarin thehthang a tum dan hi mipui pawisawina nasa tak a nih dawn avangin kan pawmpui thei lo. A tawp thlenga dodal kan tum,” tiin an lo puang tawh bawk.