Aizawl June 20, 2024 : July 2, 2024 khian Lunglei-ah Chief Minister hovin Cabinet Meeting neih a ni dawn a, Vawiin khan Lunglei Bawrhsap Ramdinliani, IAS kaihhruai hnuaiah lo dawnsawn leh lo inpuahchah dan tur ngaihtuahin DC Conference Hall-ah meeting neih a ni.

Ramdinliani chuan Cabinet Meeting, Chief Minister hova Lungleiah neih a nih tur thu sawiin hemi kawng a Chief Minister, Minister te leh Sawrkar Official-te lo dawnsawn leh lo inpuahchah dan tur ngaihtuah ho a ngaih thu a sawi. Meeting-ah hian Minister te leh Sawrkar official te thlenna tur atan Sawrkar Guest House, 20 Bn Assam Rifle, 20 Bn BSF, 2 Bn MAP leh Hotel-ah te Minister leh Sorkar official te thlentir tura rel a ni a.

Cabinet Meeting hi High Power Committee (HPC) Conference Hall/DC Conference-ah July ni 2, 2024 zing dar 11 ah neih tura tih a ni. Hemi bakah hian Security, Medical duty, Power Supply, Tui, zanriah buatsaih dan tur leh thilpek pek tur te sawiho a ni bawk.

Review Meeting hi June ni 28, 2024 ah neih leh tur a ni ang.