ZALEN July 04, 2026 : Minister hlui F. Malsawma (79) H/o Zoramthangi Chaltlang, Aizawl chu zanin dar 7:30 khan Trinity Hospital-ah a thi.

F. Malsawma hi kum 2025 khan thin cancer a ni tih hmuh chhuah a ni a. Tun hnaiah insawiselna neiin, June ni 29 khan Trinity Hospital-ah luhpui a ni a, ICU-a enkawl a ni a, zanin n dar 7:30 khan a thi a ni.

Kum 1978 MLA inthlanah khan People's Conference (PC) party ticket-in Suangpuilawn Bial atangin thlan tlin a ni a. Hemi tum hian kum 30 leh thla 9 chauh la niin, Brig. T. Sailo Ministry-ah Cabinet Minister-in a awm a, a hun lai khan India rama Cabinet Minister naupang ber pawl a ni.

Kum 1979 MLA inthlanah Suangpuilawn Bial atang bawk hian thlan tlin leh a ni a, Cabinet Minister a ni leh a. PC Ministry-ah hian Education (Social Welfare, Sports & Youth Welfare, School Education, Higher & Technical Education), Co-operation leh Industries (Sericulture & Industries) Minister a ni.

Kum 1993 MLA inthlan khan MNF Ticket-in Aizawl North-II bial atangin thlan tlin a ni a. Kum 1998 inthlanah he bial atang bawk hian thlan tlin nawn leh niin, MNF Ministry-ah Cabinet Minister a ni zui leh a. Hemi tum hian School Education, Law & Judicial and Parliamentary Affairs, Health & Family Welfare, Tourism, leh Information & Public Relations Minister a ni.