Ni 12.09.2020 khan Lailapur-ah Mizo Tank Lorry Driver te chu mi thenkhat ten kut thlakin an motor pawh tihchhiat a ni a, hemi thu kal zelah hian lirthei khalhtute chuan an lungawiloh lantir nan naktip Thawhlehni (29.9.2020) atangin Mizoram Oil Tanker Driver’s Association (MOTDA) chuan Mizorama lirthei lut leh chhuak dan an tum a. Mahse Home Department Secretary kaihhruaiin Mizoram Oil Tanker Driver's Association (MOTDA) leh Silchar Truck Driver's Association (STDA) te chuan Zirtawpni khan inbiakna an nei a, he hunah hian MOTDA te thilphut Oil Tanker chhia siamna chungchangah inremna an neih bakah hliam tuar te enkawlna senso atan Rs. 3,000/- STDA ten tumsak an inhuam avangin inremna neih a ni a. Chuvangin, ni 29.09.2020 atanga ni 7 chhung awh Mizoram lo lut leh chhuak tur mamawh phur truck danchah tumna chu thulh a ni. Hetia inremna a lo awm takah chuan Truck, Tanker, Driver leh Gas phur ten ni 18.09.2020 a sawrkara an thlen, Lailapur atanga Vairengte inkar Mizoram Police venhimna an phut anga kalpui mek pawh tih tawp nghal a ni a. Mizoram Oil Tanker Drivers Association te pawhin Dholai PS a FIR an thehluh chu an hnukkir ve thung a ni.

Tun hma atang tawhin kan thenawm Cachar nen hian buaina kan nei fo mai a, engemaw harsatna han nei hlek ila kan mamawh chawkluhna kawng hian a tuar hmasa ber zel bawk a. Tun tum buaina chungchangah pawh hian Silchar Truck Driver's Association te thilphut hi sawrkar tan chuan tih hlawhtlin chi a ni lo a, khawilai emaw pawl tereuh te te in state khat sawrkar ve riang ruang a nawm a maka engemaw an phut fo mai te hi a thinrim thlak tak zet a ni.

Covid 19 inenkawlna chungchangah sawrkarin inkaihhruaina dan a nei a, chu chu mipuite chuan kan zawm mai tur a ni. Truck driver te pawh midang enkawl danin enkawl an ni a, ei leh in chungchangah pawh duh sak bik emaw duh sak loh bik ni lovin a awm ang ang an ei a. Riahna chungchangah pawh midang awmna hmunah an awm ve tho a, a hranpaa enkawl pek an ngai lo. heti chunga chhuanlam fahrah te te hmanga sawrkarah phut an nei fo mai hi a fuh lo tak zet a ni.

Silchar kawng hi tun dinhmunah chuan kan chak lakna ber a ni a, hetia ru te emaw thinrimin an dang zel hi a fuh lo a, kan sawrkar hian state dang nena kan inkalpawhna tur leh chak kan lakna tur kawng hi tih tak zeta a ngaihtuah a tul hle. Manipur lamah a ni emaw Tripura lamah a ni emaw Karimganj lam pawh thei tur kawngpui tha tak a ngaihtuah a ngai tih a lantir chiang hle.

Enga pawh chu nise tu ten emaw kawngpui hi an dang anih pawhin keini lam ai chuan Cachar lam hi a tuartu hmasa zawk an ni tih kan hriat thar leh a pawimawh. Silchar leh a chhehvel khuan Mizoram hi an bungraw hralhna ber a ni a, kei nin kan dawr loh chuan an buai nghal tih hriat a tha. Chuvangin kan that zawkna tur a ni tih hriain Mizoram mipuite pawhin kawngpui dan a ni emaw eng buaina pawh awmse kan dawnsawn thiam a, a tul chuan tawrh deuh pawh kan inhuam a pawimawh hle.