ZALEN September 02, 2026 : Chakma Autonomous District Council (CADC)-a hnathawk 211 ten thla li hlawh an lak tawh loh avanga thubuai an thehluh chu Gauhati High Court, Aizawl Bench chuan nimin khan a ngaihtuah.

Hemi chungchangah hian Gauhati High Court, Aizawl Bench chuan Mizoram sorkar, CADC Chairman leh Executive Secretary-te chu kar li chhunga insawifiahna pe turin a ti.

Thubuai thehluttu te hi Chakma Autonomous District Council Employees Association-a member te an ni a. CADC hnuaiah hian Grade-III leh Grade-IV hna thawk lai mek an ni. November 16, 2025 atanga March 31, 2026 thleng khan an hlawh hi pek an ni lo a ni.

High Court an pan hmain hnathawktute hian thuneitute hnenah dilna vawi thum an lo thlen tawh a, a hnuhnung ber May 5, 2026 khan Deputy Commissioner, Lawngtlai district-cum-Caretaker, CADC hnenah an thehlut a, an thu thlen te chinfel sak an nih tak loh avangin court hi an pan tih thulakna (www.jclalnunsanga.in) chuan a tralang.

Justice Nelson Sailo chuan he thubuai hi a ngaihtuah a, thubuai ngaihtuah a nih chhung hian hnathawktute harsatna thlente ngaihtuah sak a, chinfel sak turin sorkar thuneitute chu a dang lo tih a tarlang bawk. Thubuai hi kar li hnuah ngaihtuah leh a ni ang.