May 11, 2023; Chakma Autonomous District Council (CADC) inthlanna a vote tla te vawiina chhiar zawh takah sorkarna siam thei khawpa party mal chak an awm lova, a siam thei teuh ber MNF party in seat 10 an la a, BJP in seat 5 an la a, INC in seat 4 an la. He result hi MNF party chuan Zoramthanga kaihhruai Mizoram sorkar rintlakzia lantirna leh kumin kum tawp MLA General Election-ah MNF a sorkar leh ngeina tur a hril niah an ngai.

CADC a sorkarna siam tur hian seat 20 ah seat 11 lak tur a ni a, tun tum inthlanah hian seat 19 ah inthlan niin, Rengkashya MDC Constituency inthlana vote tla in MNF party dinhmun hi a tichiang tura ngaih a ni a. Rengkashya MDC Constituency ah hian tun thla ni 17 khian vote thlak a ni ang.

Lawngtlai DC David Lalthantluanga Returning Officer ni bawk chuan inthlanna boruak muanawm tak hnuaia neih a ni chu lawmawm a tih thu a sawi a. inthlan buaipuitu leh mipui chungah lawmthu a sawi.

Chakma Autonomous District Council hnuaia Member of District Council Inthlanpui vote thlak naah hian vote zaa 93.75 a tla a ni.

MNF party chuan thuchhuah siamin, inthlanna tluang taka neih anih theihna tura buaipuitu official zawng zawngte chungah lawmthu an sawi.

"MNF candidate-te tlin theihna tura theihtawp chhuaha beitu zawng zawngte chungah MNF chuan lawmthu kan sawi a. He inthlan result hian Pu Zoramthanga kaihhruai Mizoram sorkar rintlakzia lantirna leh kumin kum tawp MLA General Election-ah MNF a sorkar leh ngeina tur a hril niah MNF chuan kan ngai," an ti a. "CADC inthlanna hi kum 2018 leh 2023 inkar, kum nga (5) chhunga inthlanna neih hrang hrang zinga a hnuhnung ber tur anih tawh vangin kumin 2023 MLA General Election lo awm turah pawh hian CADC huam chhungah leh Zoram hmun hrang hrangah thui takin nghawng a neih ngei kan ring a ni," an ti bawk.