Aizawl: Dr. K.Beichhua chuan, “CADC inthlan dawn hnaia mipui sum cheng nuai 1020.60 pek atanga 60% bothlau awm hi thuneituten chhui chiang vat turin kan phut tlat a ni,” a ti. Zirtawpni kalta khan Hnam Run-ah thu sawiin Dr. K.Beichhua chuan, “Chakma Autonomous District Council chu ni 20.4.2018-a inthlang mai tur an nih tawh laiin, inthlan dawn hnaih têah Governor’s rule-a an awm hma si khan Mizoram sawrkar chuan cheng nuai 1020.60 a pe a, heta tang hian zaa sawmruk (60%) hmanna mumal awm lovin a bothlau ringawt mai a ni,” a ti a. Sum bothlau hi chhuichiang turin Kamalanagar MNF District Headquarters hruaitute chuan Mizoram Governor hnenah an thlen niin a sawi bawk. Dr K Beichhua hian Mizoram Legislative Assembly vawi 15-na neih zawh tak chungchang sawiin, “Tun sawrkar budget-ah hian Congress sawrkar nihna a lang chiang hle a; Mizoram mipui sum hi rorel lai Congress sawrkar hian Non-Congress-te vuakna talhtum atan hman an tum ni berin ka hria a, Opposition MLA 6-te pe ve si lova, Congress MLA 34-te hnena D.O. Letter pea cheng nuai 400 theuh NLUP dawng tur thlanna atan an pe bikte khan India democracy dan a kalh tlat a. NLUP leh NEDP-a sum an dah dan leh ruahmanna an siam dan hrim hrim hi kumtawp MLA General Election lo awm tura Non-Congress-te vuakna  tur a ni,” a ti bawk.