ZALEN Feb 19, 2026: Nizan, February 18, 2026 khan Central YMA hnuaia Central Anti Drugs Squad (CADS) leh Excise & Narcotics Dept. hnuaia Anti Narcotics Squad te chuan thawk hovin, Bawngkawn hmun hnihah Heroin (No. 4) Hawng 33 an man.

Ruihhlo man hmasaknaah hian Lianchhiari (40), North Vanlaiphai a cheng ni a insawi hnen atangin Heroin Hawng 3 an man a. Hemi hnu hian thudawn bawhzui zelin, ZDU Office bul, Bawngkawnah vek Heroin Hawng 30 dang an man leh a ni. Ruihhlo man naah hian Zohmingliana (40) s/o Hrangmanliana leh Lalawmpuia (36) s/o Lalchhuanvawra, Edenthar Veng a cheng ve ve ni a insawi te chu an man bawk.

Nizan a ruihhlo man zawng zawng hi a vaiin Heroin (No. 4) Hawng 33 a ni a, a neitu ni a puh mi pathumte hi Excise & Narcotics Department-in dan angin thubuai an siamsak nghal a ni.

#ZalenNews