ZALEN Feb 25, 2016: Central YMA-in City Branch YMA-te zone hrang hranga a then, Zone Anti Drugs Squad (ZADS) zinga Zone II-te chuan ni 23 zan khan Heroin (No.4) Tic Tac bur 6 an man a. Hemi hnu hian CADS te kuta hlan niin, an ruihhlo lakna an chhuina kalzelah khawchhak lam atanga Heroin a hlawma lalluttu ber Vanlalena ( 43) s/o Zachunga (L) chu Thuampui Vengah an manchhuak.

Vanlalena chuan a Heroin semchhuah bang a dahna dik tak a sawi mai duh loh avangin, CADS-te chuan ruihhlo a la dahna hmun a sawite chu tlaivar a umzui in, ni 24 zan khan an inah a nupui a dah thattir thu a sawi ta a. A nupui thuzawhfiah a nih hnuah Heroin hawng 2 chu commode-a a paih vek tawh thu a sawi zet a, mahse an in a cheng ve an unaupa Lalrinkima (49), s/o Zachunga (L) chu ramhnuaiah a dah thattir thu a sawi leh ta zawk a ni.

CADS, Excise Narco leh Thuampui Branch YMA-te chuan ramhnuai chu dapin, Heroin hawng 2 thuhruk chu an manchhuak ta a ni.

Central YMA hnuaia Zone Anti Drugs Squad (ZADS) a Zone II-ah hian Branch YMA hrang hrang—Durtlang, Durtlang Leitan, Durtlang North, Leitan Ramthar, Muthi, Nausel, Selesih, Sihphir leh Sihphir Venghlun-te an tel a ni.

#ZalenNews