Sawrkar lapui chuan department hnathawh ah thil dik loh a awm leh awm loh enfiah a, chhui turin Comptroller and Auditor General a ruat thin a. CAG hian kumtin department an duh duh thlangin an hnathawh a tha em, a hmanna tur dik takah sum hman a ni em, hna a tha em tih leh dik lo a awm leh awmlohte uluk takin an endik thin a. An report hi uluk taka an duan hnuah state ah chuan Governor ah thehlutin state rorelna Assembly House ah pawh an report hi pharh thin a ni. CAG report hi tute sawi dan takin emaw ‘Luka ziak’ tluka pawm tur ni chiah lo mah se independent body an nih avang hian an thil chhui hi dik tawk tura ngaih a ni a. Mipui pawhin an pawm a, chanchinbu lam thawkte pawhin News siamna ber zinga pakhatah an ngai a ni. Hetiang hi hun engemaw chen kan lo kalpui tawh a nih laiin leh sawrkar lam atang pawha sawiselna liantham leh beihna a awmloh laiin kumin CAG report chuan sawizui a hlawh hle mai a. Report hi a dik tawklo nia sawiin sawrkar lam chuan High Court Judge tanglai emaw chawl tawh in emaw chhui se an ti hial a, mahse Assembly Secretariat (Legislature) lamin an phal ta lo mai a ni. Sawrkar lamin a dik tawklo nia an sawi laiin eptu lam chuan an pawm hmiah niin a lang a, kum lokal zel turah pawh sawisel hlawh chho zelin CAG report hian sawihnawm a hlawh zel ang tih a hlauhawm khawp mai. Tun tum a CAG report in sawi a hlawhna chhan ber chu NLUP chungchang an tarlan vang hi a ni awm e. NLUP hi rorellai Congress sawrkar flagship programme a ni a, sawrkar lamin a hlawhtling viau nia an sawi lai leh kan ram economy pawh chawikang a, GSDP pawh a san phah nia chhuang taka an sawi laiin CAG lam chuan a hlawhchham tiin an report-ah an tarlang a. Hei tak hian inhnialna a chawk chhuakin department dang report an siamah hlet a nei chho zel ta a ni ber mai. CAG lam hian report an siam hian uluk takin a hmunah ngei an enfiah bakah mi engemaw zat kaltlangin a thutawp (final) chu New Delhi lama siam niin an sawi a. Department an chhui lai hian an mamawhte chu an dil thin thu leh thutlukna an siam dawnah pawh department hotu lute nen an la sawiho zel niin an sawi bawk a. Hetiang taka uluk an nih chuan an report hi a dik ngei tura ngaih a ni. Mahse, hei hi CAG lam tanchhan anih laiin department lamte erawh chuan an diklohna lai hailan tum ngawr ngawr leh an mamawh an pek document te pawh tarlang tha duh lo leh kim loah an puh ve thung a. Kumin ang em chuan kumdangah sawiselna awm lo mah se department lam pawh hian tanfung eng emaw tak chu an nei ve zel a ni. Engpawhnise, CAG report hi final a ni lo a, thutlukna siamtu tur tak tak chu mipui thlan lal Assembly member te an ni. Assembly member te pawhin a huhoa chhui lovin he lam buaipuitu tur bik ‘Public Account Committee (PAC)’ an nei a, heng mite hian uluk taka an bih hnuah thutlukna chu an siam dawn a ni. Tun dinhmunah chuan mipui an chiai in enge thudik tih hriat a har a, a chhuitu tur dik tak PAC te hian rang takin CAG report hi han bawhzui teh se. Hrem ngai an awm a, thil diklo ti an awm chuan huai takin hrem ngam teh se. Mipuite hian thudik hriat an chak a, thudik hailang lang leh a tul a nih chuan thil dik lo tite hrem ngam kan mamawh e.