Aizawl: Fisheries department in Serlui B a cage culture hmanga sangha chi khat pangasius (phuhlip nei lo chi) an vulh atangin sangha quintal 502 an thar tawh. Serlui B a sangha khawina hmun hi Zirtawpni kalta khan chanchinbumi ten an tlawh a, Fishries department thawktute chuan cage culture ah hian September ni 27,2013 atangin sangha an dah tan tih an sawi a. Cage culture hi hmun 3 ah awmin a vaiin bawm 96 a awm a, tunah hian cage 29 ah sangha hi khawi mek a ni. Heng cage culture te hi Builum, Bilkhawthlir leh North Chawnpui a kuthnathawk thlanbik ten enkawlin sangha hralh anih hunah a pawisa hi department leh kuthnathawktute hian zat leh zat (50/50) in an insem leh thin a ni. Cage culture hi Serlui tuikhuah mai bakah Tuirial leh hmundangah te pawh la chhunzawm zel tum a ni. Fisheries department thawktute chuan sangha an dahte chu thla 8-10 inkar velah a man theih thin niin an sawi a, sangha chu kg 3 te pawh an awm thei niin an sawi. Mi thenkhat bomb hmanga sangha man thin an awm nia sawiin sangha ten an hlauh thin em avangin an sangha khawi pawh tam tak a thih phah a, chuvangin bomb hmang chuan sangha man tawhlo se an duh tih an sawi bawk.