Champion lai, Ramhlun Venglai Cricket Club chuan Cricket Association of Mizoram (CAM) hnuaia inelna ngaihhlut hlawh, first division club-te chauh inlan phakna, CAM Cup 2023-24 nomawi an la leh ta a, kum zawnin an champion.

Kumin final-ah hian nikuma a tawp kharnaa inhmachhawn tho, Kulikawn Cricket Club an inhmachhawn leh a, result ngai bawk a chhuak lehin Kulikawnin phuba lakna remchang nei mah se an puitlin thei ta lo.

Suaka Cricket Ground, Sihhmuia final khelhah Ramhlun Venglai hian Thawhlehni khan Kulikawn hi wicket thuma hnehin an champion leh ta a ni.

Final-ah hian Ramhlun Venglai bowler Remruatdika Ralte chuan tum (innings) hnih vawmah wicket ruk lai lain a thawh hlawk hle a, a vuak lamah an chakna hnar pakhat zingah tel bawkin Man of the Match a ni.

Iinnings hniha khelh CAM Cup final-ah hian Kulikawn chu thum vawrah chakin vuak hmasak an thlang a; mahse, an tum angin bul an tan fuh lo thung a. Sahil Reza chuan run 25 siamin C. Lalrempuia’n run 17 a thawh bawk a, anni pahnih bak hi run 10 siam kai an awm lo.

Remruatdika leh G. Lalbiakvela ten Ramhlun Venglai tan wicket thum ve ve lain Kulikawn hi run 95 chiah siamin an vawm hlum vek.

Ramhlun Venglai hian thawh khatnaa Kulikawn run siam chu run 68 laia khumin run 163 an thawk chhuak a, opener Vanlalhruaitluanga leh wicket keeper Lalhmachhuana ten run 36 ve ve siam a. Kulikawn tan hian K. Lalthazuala chuan mi pali vawm hlumin Lalramnunsiama’n mi pathum a vawm hlum ve bawk.

Thawh hnihnaah run 68-a hnufual chungin Kulikawnin an bei let a, Parvez Ahmed-a’n run 70 siamin thawh khatnaa siam tam ber, Sahil Reza chuan run 44 a thawh ve bawk a, run 180 an tlin a. Thawh hnih belhkhawmin Ramhlun Venglai tan chak turin run 113 an chhawp thei.

An vawm thawh hnihnaah hian Ramhlun Venglai tan Remruatdika bawk che tha lehin mi pathum a vawm hlum leh a, F. Lalruatfela’n mi pathum tho a vawm hlum ve bawk.

Ramhlun Venglai hi vuak thawh hnihnaah bul an tan tha lo va, an bul tantute an thih hma avangin Kulikawn pawh an phur hman hle a; mahse, CAM Cricketer of the Year-a thlan hlim, Joseph Lalthankhuma an ngam lo va, run 42 siamin wicket keeper-in run 23-in a puih bakah a vawm lama thawh hlawk, Remruatdika’n run 38 a siam bawk a. Champion lai lakah Kulikawn an dingchang zo ta lo.

CAM Cup hi first division club pariatten November 23 atanga Suaka Cricket Ground, Sihhmuiah an khel tan a. International level-a Test match an khelh thin ang, innings hniha khelh a ni a, ni thum chhunga khelh zawh hman tura ruahman a ni.

Champion zo ta lo mah se mi mal lawmman erawh Kulikawnin an hui vek a, Best Batsman atan Sahil Reza thlan a ni a, Best Bowler atan Ramnunsiama leh mi mal chawimawina ngaihhlut ber, Man of the Series-ah C Lalrempuia thlan a ni.

CAM Cup champion Ramhlun Venglai hian nomawi bakah Rs. Nuai khat leh match money Rs. 60,000 an dawng a. Kulikawn hian Rs. 60,000 leh match money Rs. 60,000 an dawng bawk.