Cricket Association of Mizoram (CAM) Cup 2023/24 chu Ningani atangin first division club pariatten Suaka Cricket Ground, Sihhmuiah an khel tan dawn.

CAM Cup hi international level-a Test match an khelh thin ang, thawh (innings) hniha khelh tur a ni a, ni thum chhunga khelh zawh hman tura ruahman a ni.

Ni thum chhunga chak zawk awm hman loh (inhnehtawk) a awm chuan thawh khatna (first innings)-a hma hruaitu zawk chaka puan an ni ang.

Kumin CAM Cup-ah hian first division club pariatte chu Pool A leh B-ah pali ve vea then an ni a, a chak lo zawk tlak nghal zel a ni ang.

Tournament tan nan hian Pool A atangin Ramhlun Venglai Cricket Club leh Bawngkawn South Cricket Club an inhmachhawn dawn a. An pool-ah hian Chhinga Veng Cricket Club leh Zarkawt Lords Cricket Club an awm bawk.

Pool B-ah Zemabawk Pitchers Cricket Club, Chanmarians Cricket Club, Kulikawn Cricket Club leh Thuampui Chinari Cricket Club te an awm thung.

December 7 leh 13 inkarah semifinal inkhel pahnih a awm ang a, December 18-20 chhungin final khelh tura ruahman a ni.

CAM Cup-ah hian nikum khan Ramhlun Venglai an champion a, final-ah Kulikawn CC an hneh.

Tunah hian CAM buatsaih President’s Cup chu Sihhmuiah khelh mek a ni bawk a, Nilaini chawhma dar 11:00 hian Thuampui Chinari CC leh Kulikawn CC ten final an khel ang.

Ruahin Thawhlehni semifinal a tihbuai deuh karah Thuampui Chinari CC hian Chhinga Veng CC chu wicket riatin an hneh a. Over 20-a khelh tur ni mah se ruah a sur avangin over 10-ah pawh tawisak an ni.

Semifinal hnuhnung zawkah Kulikawn CC-in Venghnuai Raiders Cricket Club chu run 24-a hneh ve thungin final an lut a ni.