November 2, 2023; Inthlan campaign vawrtawp thleng mekah 'BJP thawhpui leh thawhpui loh' chungchang chu party te au hla langsar ber pakhat a ni mek.

BJP te'n sawrkar a tel pha khawp MLA neih ngei tumin an thapui an chhuah a, development lian tham tak tak an rawn tiam a, mipui rin loh takin NDA a an thawhpui MNF an rawn bei na viau thin bawk.

MNF party lamin NDA a BJP an thawhpuina chu issue based a ni tih an puang mek thung a, party dang, congress leh ZPM lamin MNF chu Mizoram a BJP thawhpui mek awmchhun an ni tih uar takin an puang thung.

Congress party lamin 'Sakhaw Zalenna' an sawi uar a, a bikin ram pum huap a an au tam pui leh an sawi uar ber pakhat pawh a ni mek.

Congress party hian MNF mai bakah ZPM pawh BJP nen a inhiattawn a, inzawmna neiah an sawi mek a, a bikin an leader Duhoma'n BJP a lo thawhpui tawh thinna nia ngaih theih thu hrang hrang social media ah vawrh darh a ni mek bawk.

Hetiang karah hian ZPM lam chuan BJP an thawhpui dawn lo tih an puang ve mek bawk a, BJP nen a inzawmna nei a, BJP atanga pawisa dawng anga ZPM puh an nihna pawh thubuai ah la in, Chief Judicial Magistrate (CJM) ah complaint an thehlut bawk.

Inthlan campaign vawrtawp a thleng mek a, a bikin Aizawl ah chuan party ten a an sawi tam leh an inpuh kualna chu 'BJP thawhpui leh thawhpui loh' chungchang a ni. Development leh manifesto lam aimah a sawi rik tam a ni mek.!